Annar kajakræðaranna sem bjargað var úr sjónum við ós Þjórsár í gærkvöldi er látinn. Ekki verður, að svo stöddu, greint frá nafni hans. Rannsóknardeild lögreglunnar á Suðurlandi fer með rannsókn málsins. Þetta kemur fram í tilkynningu frá lögreglunni á Suðurlandi.

Lögreglan hafði áður sent frá sér eftirfarandi skeyti í gær vegna slyssins.

„Tvær þyrlur Landhelgisgæslunnar björguðu tveimur mönnum úr sjónum við Þjórsárós í kvöld. Lögreglunni á Suðurlandi barst tilkynning klukkan 21:13 í kvöld um tvo menn í vandræðum á kajökum í briminu við ósinn. Þyrlur Gæslunnar, björgunarsveitir, sjúkralið og lögregla fóru þegar á staðinn. Þegar björgunarlið kom á vettvang sáust kajakarnir á hvolfi austan við ósinn.

Allan tímann var símasamband við annan manninn og þyrluáhafnirnar sáu til mannanna í briminu mun vestar. Það tókst að hífa annan manninn upp í aðra þyrluna og hinn síðar í hina þyrluna. Flogið var með mennina á bráðamóttöku Landspítalans í Fossvogi.

Ekki er vitað um líðan mannanna á þessari stundu. Lögreglan á Suðurlandi fer með rannsókn þessa slyss og hún er ekki kominn á þann stað að hægt sé að veita upplýsingar um aðdraganda þess.

Ölduhæð var svo mikil að ekki var unnt að koma út björgunarbátum. Það er mat lögreglumanna á staðnum að það hafi skipt sköpum við björgunina að tvær þyrlur hafi komið á staðinn.

Lögreglan þakkar öllum þeim sem komu að björguninni fyrir frábært starf og samstillingu.“