Karlmaður sem í byrjun árs var dæmdur í átta ára fangelsi fyrir að beita barnsmóður sína hrottalegu ofbeldi verður í fangelsi þar til dæmt verður í máli hans fyrir Hæstarétti. Þetta er niðurstaða Hæstaréttar sem staðfesti þar með úrskurð Héraðsdóms Reykjaness í málinu.
Maðurinn var meðal annars dæmdur fyrir nauðgun, frelsissviptingu, sérstaklega hættulega líkamsárás og tilraun til manndráps fyrir árásina sem framin var í júlí í fyrrasumar. Konan missti meðal annars meðvitund í árásinni og hlaut margvíslega áverka.
Þann 31. janúar síðastliðinn var maðurinn dæmdur í átta ára fangelsi en þá hafði hann setið í gæsluvarðhaldi vegna málsins frá 24. júlí í fyrrasumar. Maðurinn áfrýjaði fangelsisdómnum til Hæstaréttar en samkvæmt úrskurði Hæstaréttar verður maðurinn áfram í haldi, í það minnsta þar til sá dómur hefur verið kveðinn upp.