Benedikt Jóhannesson efnhags- og fjármálaráðherra var gestur hjá Birni Inga Hrafnssyni í sjónvarpsþættinum Eyjan á ÍNN í gærkvöldi. Víða var komið við í tæplega 40 mínútna löngu viðtali. Ráðherrann fór yfir ýmis mál en eitt af því sem var rætt var fyrirhuguð aukning á prósentustigi virðisaukaskatts í ferðaþjónustu sem er ein af forsendum í nýrri fjárhagsáætlun ríkisstjórnarinnar. Þetta kemur fram á Eyjunni.
Björn Ingi greindi frá því að þegar hann tilkynnti að fjármálaráðherra yrði gestur þáttarins hefðu reiðir og áhyggjufullir ferðaþjónustuaðilar haft samband við hann. Björn Ingi sagði:
„Menn segja einfaldlega að verði þetta að veruleika í óbreyttri mynd þá geti það verið tilræði við ferðaþjónustuna. Og þeir segja líka: Það var ekkert samráð haft við ferðaþjónustuna um þetta mál. Þetta var bara kynnt skömmum fyrirvara og gert ráð fyrir þessu í áætluninni. Er þetta ekki rétt?“
Benedikt svaraði og sagði að laun hefðu hækkað í öllum íslenskum atvinnugreinum. Gengið hefði styrkst en áskoranir vegna þess ættu við allar aðrar greinar í útflutningi. Bætti hann við að ferðaþjónustan væri búin að vera í lægra þrepi virðisaukaskatts sem væri ívilnandi fyrir greinina. Hann tók ákveðið af öll tvímæli um það að virðisaukaskattsprósentan í ferðaþjónustunni yrði hækkuð.
„Þetta er auðvitað ákvörðun sem stendur. Menn verða að ná endum saman.“