Karlmaður sem í janúar síðastliðnum var dæmdur í átta ára fangelsi fyrir hrottalega árás gegn sambýliskonu sinni mun sitja áfram í gæsluvarðhaldi þar til Hæstiréttur hefur dæmt í máli hans. Maðurinn var dæmdur fyrir tilraun til manndráps, nauðgun, frelsissviptingu og sérstaklega hættulega líkamsárás en dómnum var áfrýjað og var manninum gert að sæta gæsluvarðhaldi á meðan máls hans er til meðferðar.
Maðurinn var ákærður fyrir að hafa haldið sambýliskonu sinni fanginni á heimili þeirra og ítrekað beitt hana grófu ofbeldi og hótunum. Meðal annars kemur fram í dómnum að maðurinn hafi tekið hana kverkataki, kýlt hana margsinni í andlit, höfuð og líkama og rifið í hár hennar.
Þá kemur fram að hann hafi hótað konunni ítrekað lífláti og þrýst hnífi að háldi hennar og hótað að stinga hana ef hún þegði ekki. Einnig kemur fram að hann hafi áreitt konuna kynferðislega og þvingað hana til að hafa við sig munn og endaþarmsmök, auk þess sem hann hafi tekið myndir af kynfærum hennar.
Maðurinn hafði áður hlotið dóm fyrir ofbeldi gegn konunni en fyrir dómi voru lýsingar hans á atburðinum afar ólíkur lýsingum konunnar. Fram kom í dómi héraðsdóms að brot mannsins væru alvarleg og ófyrirleitin og þá kom fram í vottorði sálfræðings að konan hefði upplifað ótta, hjálparleysi og lífshættu á meðan á árásinni stóð.