Umfangsmikil lögreglurannsókn á hvarfi Birnu hófst daginn sem tilkynnt var um hvarf hennar
Gæsluvarðhaldsúrskurðir yfir Thomasi Möller Olsen, sem er ákærður fyrir morðið á Birnu Brjánsdóttur, sýnir að umfangsmikil lögreglurannsókn hófst á hvarfi hennar daginn sem tilkynnt var um hvarf hennar, þann 14. janúar síðastliðinn. Þá vissi lögreglan að manneskju hefði verið ráðinn bani í rauða Kia Rio bílnum þegar Olsen var handtekinn þann 19. janúar.
Þetta kemur meðal annars fram í gæsluvarðhaldsúrskurðinum en Héraðsdómur Reykjaness aflétti trúnaði sem var á úrskurðinum í vikunni.
Niðurstöður DNA rannsókna á blóðinu sem fannst í rauðu Kia Rio bifreiðinni leiddu í ljós að blóðið var úr Birnu. Að auki fundust þekjufrumur úr Birnu og Thomasi á skóreim á skóm sem Birna átti. Skórnir fundust við Hafnarfjarðarhöfn þann 16. janúar. Sjálfboðaliðar fundu skóna. Myndavélar sýndu að Kia Rio bifreiðin hafi verið stödd í námunda við staðinn þar sem þeir fundust þann 14. janúar.
Ökuskírteini Birnu fannst um borð í Polar Nanoq. Fingrafar Thomasar var á því. Þá fannst blóð úr Birnu á úlpu Thomasar. Þá sást glögglega að fatnaður, sem búið var að þvo um borð í togaranum og voru í eigu Thomasar, hafi komist í snertingu við mikið magn blóðs.
Thomas gaf, að mati ákæruvaldsins, ekki trúverðugan framburð um atvik umrædda nótt og morgun. Hann hafi sagt hafa tekið tvær konur upp í bifreið sína í miðbæ Reykja´vikur en skilið við þær við hringtorg nálægt Vallarhverfi í Hafnarfirði um morguninn. Þá gat hann ekki gefið trúverðugar skýringar á því hvar hann ar á milli klukkan 7 og 11 þennan morgun. Bifreið Thomasar var ekið af hafnarsvæðinu um klukkan 7 og birtist aftur í myndavélum rúmlega 11.
Einnig kemur fram í gæsluvarðhaldsúrskurðinum að Thomas hafi eytt drjúgum tíma í að þrífa aftursæti Kia Rio bifreiðarinnar laugardaginn 14. janúar áður en hann skilaði henni. Mestum tíma eyddi hann í að þrífa sætið hægra megin.
„Hafi ákærði sagt að hann hafi verið að þrífa upp ælu en hann hafi ekki orðið var við neitt blóð í bifreiðinni. Sé þessi framburður ákærða í hróplegu ósamræmi við gögn málsins sem þegar hafi verið minnst á.”
Thomas hefur sætt gæsluvarðhaldi vegna málsins frá 19 janúar. Hann gæti átt yfir höfði sér ævilangt fangelsi.