Síðdegis í gær var ökumaður stöðvaður í Kópavogi. Bifreiðin sem hann ók hafði verið tilkynnt stolin. Auk þess að vera grunaður um að hafa stolið bifreiðinni er ökumaðurinn grunaður um að hafa ekið undir áhrifum fíkniefna, að hafa ekið sviptur ökuréttindum (ítrekað brot hjá honum) og vörslu fíkniefna. Hann var vistaður í fangageymslu. Pressan greinir frá.
Á tíunda tímanum í gærkvöldi var ökumaður stöðvaður á Miklubraut vegna of hraðs aksturs. Hann er einnig grunaður um að hafa verið undir áhrifum áfengis eða örvandi/deyfandi efna. Farþegi í bifreiðinni er grunaður um vörslu fíkniefna.
Skömmu eftir miðnætti var maður handtekinn í austurhluta Reykjavíkur en hann er grunaður um heimilisofbeldi. Hann var vistaður í fangageymslu.
Á fimmta tímanum í nótt var ungt par handtekið á lokuðu athafnasvæði fyrirtækis við Skútuvog. Tilkynnt hafði verið um grunsamlegar mannaferðir inni á svæðinu. Parið var búið að setja hluti í töskur þegar lögreglan kom á vettvang. Parið var vistað í fangageymslu vegna rannsóknar málsins.
Á þriðja tímanum í nótt var tilkynnt um innbrot/þjófnað úr frístundaheimili í Safamýri. Þaðan var stolið flatskjá, tölvu og fleiru.
Tveir ökumenn voru handteknir um kvöldmatarleytið í gær. Annar er grunaður um ölvun við akstur og að hafa ekið sviptur ökuréttindum. Hinn er grunaður um að hafa ekið undir áhrifum fíkniefna auk brota á lyfja- og vopnalögum.