60 til viðbótar yfirgáfu landið sjálfviljugir
85 einstaklingar sóttu um alþjóðlega vernd á Íslandi í mars, til samanburðar sóttu 48 einstaklingar um vernd í sama mánuði á síðasta ári. Fjöldi umsókna á fyrstu þremur mánuðum þessa árs var samanlagt 223 eða rúmlega 60% meiri en á sama tíma á síðasta ári (137).
Þetta kemur fram í tilkynningu frá Útlendingastofnun. Þar segir einnig að það sem af er aprílmánuði hafa um 40 einstaklingar sótt um vernd og er heildarfjöldi umsókna á fyrstu 15 vikum ársins því kominn yfir 260. Áframhaldandi fjölgun umsókna það sem af er ári, samanborið við árið 2016, bendir til þess að heildarfjöldi umsókna um alþjóðlega vernd verði meiri í ár en í fyrra.
Umsækjendur í mars voru af 18 þjóðernum en flestir komu frá Albaníu (26) og Makedóníu (14), nánari upplýsingar um þjóðerni umsækjenda eru á tölfræðisíðu vefsins. 54% umsækjenda komu frá ríkjum Balkanskagans. 76% umsækjenda voru karlkyns og 24% kvenkyns. 74% umsækjenda voru fullorðnir og 26% yngri en 18 ára. Tveir umsækjendur kváðust vera fylgdarlaus ungmenni.
Stoðdeild Ríkislögreglustjóra flutti 70 einstaklinga úr landi í mars. 60 einstaklingar til viðbótar yfirgáfu landið sjálfviljugir, þar af 43 með stuðningi Útlendingastofnunar og 8 með stuðningi Alþjóða fólksflutningastofnunarinnar (IOM).
Þá hefur afgreiðsla á forgangsmálum lengst. Þá má skýra af þeim mikla fjölda umsókna um alþjóðlega vernd sem barst síðustu fjóra mánuðina í fyrra. Þá sóttu 748 um vernd en þar af voru 548 frá Albaníu og Makedóníu. Þetta leiddi síðan til þess að afgreiðslutími hefðbundinnar efnismeðferðar og málsmeðferðar á grundvelli Dyflinnar-reglugerðarinnar lengdist einnig.
