Gunnar vill að Sigmundur Davíð yfirgefi Framsóknarflokkinn og stofni nýjan flokk
Gunnar Kristinn Þórðarson stjórnsýslufræðingur segir að honum hafi verið tjá að hann hafi verið rekinn úr Framsóknarflokknum eftir að hann fór í viðtal þar sem hann hvatti Sigmund Davíð Gunnlaugsson, þingmann og fyrrverandi formann, að yfirgefa Framsóknarflokkinn og stofna nýjan flokk.
Gunnar Kristinn segir að hann og fleiri Framsóknarmönnum misbjóði ástandið í flokknum eftir að Sigmundur var felldur í formannskjörinu síðasta haust. Gunnari var áður vikið úr flokknum, þá fyrir mistök eftir að hann bað um að vera fjarlægður af framboðslista í kjölfar landsfundar Framsóknarflokksins síðasta haust.
Samkvæmt upplýsingum frá skrifstofu Framsóknarflokksins er um að ræða misskilning og Gunnar Kristinn sé enn skráður í flokkinn, enda brjóti það gegn lögum flokksins.
Sveinn Hjörtur Guðfinnsson formaður Framsóknarfélags Reykjavíkur sagði í samtali við Eyjuna að Gunnar Kristinn sé enn í flokknum en Gunnar hafi ekki fengið sent fréttabréf flokksins líkt og aðrir flokksmeðlimir. Aðspurður um hvort það geti verið tilviljun eða misskilningur að Gunnar hafi ekki fengið fréttabréf flokksins í apríl, segir Sveinn Hjörtur:
„Ég ætla ekki að segja til um það, en það er þá mjög sérstök tilviljun. Eftir því sem ég best veit er Gunnar enn skráður í flokkinn, en hann fékk ekki síðasta fréttabréf, sem má að öllum líkindum rekja til mistaka á skrifstofu flokksins.“