Bjarni Halldór Janusson, varamaður Viðreisnar verður í dag yngsti sitjandi þingmaður Íslandssögunnar. Bjarni Halldór er fæddur í desember árið 1995 og er því 21 árs og fjögurra mánaða gamalll. Hann tekur sæti á Alþingi í fjarveru Þorgerðar Katrínar Gunnarsdóttur líkt og greint er frá á vef Eyjunnar.
Bjarni Halldór slær þar með met Jóhönnu Maríu Sigmundsdóttur, sem tók sæti á þingi fyrir Framsóknarflokkinn á síðasta kjörtímabili, þá 21 árs og 303 daga gömul. Jóhanna sló met Gunnars Thoroddsen sem var 23 ára og 177 daga gamall þegar hann komst fyrst á þing 1934.
Bjarni Halldór er nemi í stjórnmálafræði og heimspeki við Háskóla Íslands og situr jafnframt í Stúdentaráði. Hann er einn af stofnendum Viðreisnar og sat í fyrstu stjórn flokksins. Hann er jafnframt einn af stofnendum ungliðahreyfingar flokksins og er fyrsti formaður hennar.
Bjarni Halldór er frá Njarðvík en í samtali við Víkurfréttir kveðst hann vera meira en tilbúinn í slaginn og hyggst beita sér fyrir málefnum unga fólksins á þingi.
„Aldurshópurinn 18 til 25 ára er sá hópur sem er í hvað mestri hættu þegar kemur að andlegum veikindum. Ég ætla vekja athygli á þeirra stöðu. Svo er fæðingarstyrkur námsmanna lægri en þeirra á vinnumarkaði. Mig langar einnig að vekja athygli á því, ásamt að koma öðrum almennum málum ungs fólks í umræðuna. Það eru nefnilega oftast þeirra mál sem sitja á hakanum þegar kemur að fjárveitingum.“