Lögregla handtók tvo menn, grunaða um líkamsárás í gærkvöldi eftir að tilkynnt hafði verið um heimilisofbeldi í Breiðholti. Í nótt var svo einn maður handtekinn í Kópavogi grunaður um líkamsárás og heimilisofbeldi samkvæmt tilkynningu frá Lögreglunni á höfuðborgarsvæðinu.

Töluvert var um að ökumenn væru stöðvaðir, grunaðir um akstur undir áhrifum áfengis eða annarra vímuefna og voru nokkrir í umferðinni sem höfðu þegar verið sviptir ökuréttindum.

Um hálfþrjú í nótt var tikynnt um bílveltu á Gullinbrú í Reykjavík. Þrír voru í bifreiðinni og sluppu þeir allir með lítilsháttar meiðsli.

Lögreglan stöðvaði bíl á Sæbrautinni í gærkvöldi, kom þá í ljós að ökumaðurinn var með útrunnin ökuréttinndi, bílinn var ótryggður og sjö ára dóttir mannsins var farþegi í bílnum.

Lögreglan hafði einnig afskipti af manni sem ræktaði fíkniefni á heimili sínu í Grafarholti. Í miðborginni var ölvaður maður handtekinn fyrir að brjóta rúðu og í Breiðholti kom upp mál þar sem áfengi var selt út af veitingastað.