Hótelgestir á Valaskjálf á Egilsstöðum fóru fram á skaðabætur eftir nætursvefn þeirra var truflaður um páskahelgina. Þetta kemur fram í Austurfrétt. Eigandinn Þráinn Lárusson hefur áhyggjur af því að atvik sem þessi geti skapað illt umtal sem valdi gríðarlegu tjóni.

Í Valaskjálf er rekið hótel, skemmtistaður og menningarhús. Þrátt fyrir að hávaði frá skemmtistaðnum og menningarhúsinu geti truflað hótelgesti segir Þráinn að hingað til hafi samstarfið gengið vel.

Atvikið, sem varð til þess að gestirnir fóru fram á skaðabætur, átti sér stað að aðfaranótt páskadags. Hótelgestir vöknuðu við læti í fólki sem var að koma af skemmtistaðnum. Þegar gestirnir reyndu að biðja um svefnfrið var þeim svarað með dónaskap og fólkið grýtti snjóboltum í hótelið og girti niðrum sig. Gestirnir munu fá dvöl sína endurgreidda auk skaðabóta.

Þráinn segir að verið sé að undirbúa kæru vegna málsins. Hann segir að svona lagað verði ekki oft látið koma fyrir. Þá ljúki einfaldlega tilrauninni með skemmtistaðinn.