ISIS lýsir yfir ábyrgð á hryðjuverkinu í París í gærkvöldi

„Það má ekkert trufla grundvallarathöfn lýðræðis okkar”

Frönsk yfirvöld segja að um hryðjuverk hafi verið að ræða, í gærkvöldi, þegar karlmaður myrti lögreglumann í París og særði tvo aðra. Hinn grunaði í málinu er 39 ára og með franskt ríkisfang. Hann hefur verið undir eftirliti lögreglunnar vegna mögulegra tenginga við hryðjuverkahópa og var talið að hann væri róttækur íslamisti. Hryðjuverkasamtökin ISIS hafa sagt að maður úr sínum röðum hafi myrt lögreglumanninn.

Árásin gæti haft áhrif á val margra kjósenda á sunnudaginn en þá ganga Frakkar að kjörborðinu og kjósa nýjan forseta.

Lögreglan hefur enn ekki birt nafn hins grunaða opinberlega. Mikil öryggisgæsla verður í Frakklandi í kringum kosningarnar og segir Bernard Cazeneuve forsætisráðherra að allt öryggislið landsins verði á vakt á sunnudaginn:

„Það má ekkert trufla grundvallarathöfn lýðræðis okkar,”

Þetta sagði Bernard við blaðamenn eftir neyðarfund ríkisstjórnarinnar. Franska lögreglan er nú með fjölskyldu mannsins í haldi. Annar maður, grunaður um aðild að verknaðinum, hefur gefið sig fram við belgísk yfirvöld. Í bíl byssumannsins fannst haglabyssa og hnífar.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.