Fréttir

Þetta flogaveikilyf orsakaði vansköpun hjá þúsundum barna

Allt að 4.100 tilfelli gætu átt rætur sínar að rekja til lyfsins

Ritstjórn DV
Fimmtudaginn 20. apríl 2017 20:00

Flogaveikilyf sem gefið var konum á meðgöngu og notað við geðhvörfum á að hafa leitt til vansköpunar hjá allt að 4.100 börnum samkvæmt franskri bráðabirgðarannsókn

Lyfið nefnist Valpróínsýra (e. Valproate) og var fyrst kynnt í Frakklandi árið 1967. Það er selt víða um heim, meðal annars á Íslandi, undir mörgum mismunandi samheitum. Það hefur meðal annars verið markaðssett undir heitunum Depakine, Epilim, Stavzor og Depakote. Þá er lyfið jafnan selt undir heitinu Orfiril hér á landi.

Í frétt BBC um málið kemur fram að niðurstöður rannsóknarinnar hafi leitt í ljós að konur sem fengu lyfið væru í allt að fjórum sinnum meiri hættu á að fæða vanskapað barn. Í kjölfarið hafa læknar í Frakklandi verið beðnir um að gefa lyfið hvorki ófrískum konum né konum á barneignaraldri.

Að því er fram kemur í nýrri skýrslu frönsku lyfjaeftirlitsstofnunarinnar hafa á bilinu 2.150 til 4.100 börn fæðst með alvarlega vansköpum af völdum lyfsins.
Börn kvenna sem tóku Valpróínsýru á einhverjum tímapunkti hafa fæðst með hjarta- og kynfæragalla og ófullþroskaðan hrygg. Þá eru börn þessara kvenna einnig í hættu á að fæðast einhverf og eiga við þroskunarörðugleika að etja.

Konur sem tóku Valpróínsýru gegn geðhvörfum voru í minni hættu að fæða vansköpuð börn en þær sem tóku lyfið við flogaveiki. Líkurnar voru þó tvisvar sinnum meiri en hjá þeim sem tóku ekki lyfið á annað borð.

Allmargar fjölskyldur í Frakklandi hafa tekið sig til og stefnt framleiðanda lyfsins, Sanofi, fyrir að hafa ekki varað við mögulegum áhættuþáttum tengdum notkun þess. Fjölskyldurnar eiga það sameiginlegt að hafa gengið í gegnum það erfiða ferli að eignast vansköpuð börn.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af