Sat fyrir lögreglumönnunum með AK-47 og hóf skothríð

Byssumaðurinn sagður hafa viðrað þá skoðun sína að hann langaði að drepa lögreglumenn

Að störfum í miðborg Parísar í kvöld.
Franska lögreglan Að störfum í miðborg Parísar í kvöld.
Mynd: EPA

Lögreglumaður var skotinn til bana í miðborg Parísar í kvöld og tveir til viðbótar særðust alvarlega þegar byssumaður hóf skothríð. Atvikið átti sér stað við Champs Elysees, skammt frá staðnum þar sem kappræður vegna forsetakjörsins í Frakklandi fóru fram.

Franska lögreglan hefur sent frá sér yfirlýsingu vegna málsins þar sem fram kemur að lögregla hafi vitað hver hinn grunaði væri vegna öfgafullra skoðana hans. Um hafi verið að ræða hryðjuverkaárás. Undir þetta tók Francois Hollande Frakklandsforseti í orðsendingu til frönsku þjóðarinnar í kvöld.

Byssumaðurinn var skotinn til bana af lögreglu.

Talið er að maðurinn hafi setið fyrir lögreglumönnunum og haft það eina markmið að skjóta þá til bana. Hann er sagður hafa verið vopnaður AK-47 hríðskotabyssu. Lögregluþjónninn sem var skotinn var í kyrrstæðri lögreglubifreið á rauðu ljósi þegar maðurinn kom aðvífandi.

Lögregla ruddist til inngöngu á heimili mannsins í kvöld og stendur þar húsleit yfir. Að því er BFM-sjónvarpsstöðin greindi frá í kvöld hafði maðurinn viðrað þá skoðun sína á samfélagsmiðlum að hann „langaði að drepa lögreglumenn.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.