Donald Harvey var sakfelldur fyrir morð á 37 einstaklingum
Donald Harvey, 64 ára fangi í Toledo í Ohio í Bandaríkjunum, lést í vikunni, tveimur dögum eftir að hann fannst illa slasaður í fangaklefa sínum.
Harvey þessi komst í heimsfréttirnar árið 1987 þegar hann játaði að hafa banað 37 einstaklingum þegar hann starfaði sem aðstoðarmaður hjúkrunarfræðings á sjúkrahúsum í Cincinnati í Ohio og London í Kentucky. Síðar viðurkenndi hann að hafa banað átján einstaklingum til viðbótar meðan hann starfaði við Veterans Administration Medical Center í Cininnati.
Harvey, sem var 64 ára, var dæmdur í lífstíðarfangelsi án möguleika á reynslulausn fyrir glæpi sína. Flestir sjúklinga hans voru mikið veikir einstaklingar og notaði hann eitur á borð við arsen og sýaníð til að bana þeim.
Ekki hefur verið gefið út hvað varð Harvey að aldurtila, en samkvæmt frétt AP var hann barinn illa af samfanga sínum í eigin fangaklefa.