Kosið 8. júní – Vill styrkja stöðu sína fyrir viðræður um útgöngu Bretlands úr ESB
Theresa May, forsætisráðherra Bretlands, hefur boðað til þingkosninga 8. júní næstkomandi. Þetta kom fram á blaðamannafundi sem hún hélt í Downingstræti 10 nú í morgun. Með kosningunum vill May styrkja stöðu sína í breska þinginu til að tryggja útgöngu Breta úr Evrópusambandinu.
Aðeins þrjár vikur eru síðan að formlegt úrsagnarferli hófst, byggt á Brexit-kosningunni síðasta sumar. Á blaðamannafundinum sagði May að það hafi runnið upp fyrir henni fyrir skemmstu, og það hafi verið henni óljúft, að nauðsynlegt væri að kjósa að nýju. Aðeins tæp tvö ár eru síðan að kosið var síðast til breska þingsins. May hafði áður svarað því ítrekað til, spurð um hvort til stæði að flýta kosningum, að það kæmi ekki til greina og kosið yrði 2020 líkt og til hefur staðið.
May sakaði stjórnarandstöðuna, og lávarðardeild þingsins, um að veikja samningsstöðu sína gagnvart Evrópusambandinu. „Þjóðin þjappar sér saman en Westminster gerir það ekki,“ sagði hún og bætti við að flokkadrættir í þinginu, Westminster, stefndu í voða möguleikum Breta til að ná ásættanlegri niðurstöðu í samningaviðræðunum um útgönguna.
Nýjustu skoðanakannanir benda til að Íhaldsflokkurinn sé með allt að 21 prósentustiga forskot á Verkamannaflokkinn. Yrði það niðurstaðan í kosningunum myndi Íhaldsflokkurinn bæta við sig 17 þingmönnum.
Theresa May tók við sem forsætisráðherra þegar að David Cameron sagði af sér eftir Brexit-kosningarnar.