Talsvert var um útköll hjá lögreglunni á Suðurnesjum yfir páskadagana vegna ölvunar flugfarþega í Flugstöð Leifs Eiríkssonar. Að sögn lögreglunnar á Suðurnesjum fengu þrír karlmenn ekki að fara með flugi til Búdapest þar sem þeir voru verulega ölvaðir.

Annan ölvaðan ferðalang þurfti að handtaka þar sem hann lét mjög ófriðlega þar sem hann fékk ekki að fara með fllugi til Berlínar vegna ástands síns.

Loks var tveimur til viðbótar vísað frá flugi til Orlando vegna ölvunar og framkomu við áhafnarmeðlimi.
Að sögn lögreglu má í einhverjum tilvikum leiða líkur að því ölvunarástand hafi orðið meira en ella vegna tafa í flugi sem stöfuðu af óveðri.