Fjöldinn hefur rúmlega tvöfaldast frá árinu 2002
Fjöldi þeirra Dana sem taldir eru lifa í fátækt hefur rúmlega tvöfaldast á síðastliðnum þrettán árum, samkvæmt niðurstöðum skýrslu sem unnin var af efnahagsráði dönsku verkalýðshreyfingarinnar (d. Arbejderbevægelsens Erhvervsråd).
Í frétt The Local í Danmörku kemur fram að árið 2002 hafi Danir, sem búa við fátækt, verið 18.650 en árið 2015 voru þeir orðnir 44.141. Fjöldinn virðist hafa aukist mikið á síðustu misserum og varð til dæmis tíu prósenta aukning á milli áranna 2014 og 2015.
Jonas Schytz Juul, einn af skýrsluhöfundum, segir að ástæðu þessarar aukningar megi rekja til þess að minna fé er nú varið í danska félagskerfið en áður.
Í skýrslunni kemur fram að einstaklingur sé metinn fátækur ef hann þénar minna en 50 prósent af meðallaunum í Danmörku yfir þriggja ára tímabil. Námsmenn eru ekki inni í þessum tölum.