Vitni varpaði ljósi á vankanta í munavörslu lögreglunnar
Ekkert eftirlit var með því hvort haldlögðum munum og fíkniefnum væri skilað aftur í munavörslu lögreglunnar eftir að lögreglumenn tóku þá þaðan. Þetta fullyrðir fyrrverandi starfsmaður munavörslu sem bar vitni fyrir Héraðsdómi Reykjavíkur í máli lögreglumannsins Jens Gunnarssonar sem á föstudag hlaut 15 mánaða dóm fyrir brot í starfi og spillingu. Meðal þess sem Jens var sakfelldur fyrir var að hafa varðveitt tvær loftskammbyssur í skrifborðsskúffu sinni í vinnunni, byssur sem átti að varðveita í geymslu fyrir haldlagða muni. Að auki varðveitti hann fíkniefni í skúffunni og braut þannig reglur um haldlagningu, skráningu, meðferð og eyðingu fíkniefna og annarra haldlagðra efna.
DV fjallaði nýverið um hvernig umtalsverðir fjármunir og önnur verðmæti, sem haldlögð voru við húsleit í tengslum við rannsókn á kampavínsklúbbnum Strawberries, hurfu sporlaust úr munavörslu lögreglunnar á höfuðborgarsvæðinu.
Eigandi staðarins, sem átti umrædd verðmæti sem lögmaður hans segir að nemi milljónum, kærði þjófnaðinn til héraðssaksóknara síðastliðið haust. Ólafur Þór Hauksson héraðssaksóknari staðfesti í samtali við DV á dögunum að málið væri þar enn til rannsóknar. Að sögn Ólafs komst upp um hinn meinta þjófnað þegar embættið kallaði eftir mununum frá lögreglu til að láta verðmeta þá. Greip embættið þá í tómt.
Í umfjöllun DV var leitað viðbragða lögreglunnar á höfuðborgarsvæðinu þar sem Friðrik Smári Björgvinsson, yfirlögregluþjónn hjá rannsóknardeild, kvaðst aðspurður ekki muna eftir því í fljótu bragði að haldlagðir munir hyrfu úr geymslum lögreglu með þessum hætti.
Í dómsmálinu yfir Jens Gunnarssyni var kallað til vitni sem fram kemur í dómskjölum að hafi verið starfsmaður í munavörslu lögreglunnar frá október 2006 til ársloka 2007. Var starfsmaðurinn fyrrverandi kallaður til að bera vitni í ákæruliðnum er varðaði loftbyssurnar. Ummælin varpa ljósi á hvernig lögreglumenn gætu hugsanlega komist upp með að láta haldlagða muni hverfa í skjóli eftirlitsleysis. Eftir viðkomandi er haft um starfið í munavörslunni:
„Hún kvaðst hafa tekið á móti munum og fíkniefnum frá lögreglumönnum. Hún kvað lögreglumenn stundum hafa sótt muni en ekkert eftirlit hefði verið með því hvort mununum hefði verið skilað aftur eða hve lengi þeir hefðu þá. Slíkir munir hefðu stundum legið á borðum lögreglumanna eða annars staðar í deildunum.“
Nokkrar ábendingar hafa borist DV, eftir umfjöllun um hina horfnu muni í Strawberries-málinu, þess efnis að haldlagðir munir hverfi úr geymslum lögreglu, sem gefur til kynna að ekki sé um einsdæmi að ræða. DV hefur þó ekki getað staðfest þær ábendingar.