Vistaflutningabíllinn, sem fylltur var sprengiefni, byrjaði að úthluta snakki til barnanna.
Að minnsta kosti 68 börn voru meðal hinna 126 sem létust þegar sjálfsmorðsárásarmaður sprengdi upp fjölda rútna í Sýrlandi í gær. Þetta kemur fram í frétt breska ríkisútvarpsins.
Flestir hinna látnu voru flóttamenn frá herteknum bæjum í Sýrlandi, en þeim var verið að koma í skjól þegar árásin átti sér stað.
Sprengingin olli ekki aðeins tjóni þar sem hún sprakk – kraftur hennar var svo mikill að nokkrir særðust sem voru staddir innan borgarmarka Aleppo.
Það atvikaðist þannig að brak úr rútunum, sem voru staddar rétt utan við borgarmörkin, skaust inn í borgina og hæfði þar fólk sem hlaut lítilsháttar meiðsli af.
Farartækið sem árásarmaðurinn ók var vistaflutningabíll, sem fylltur hafði verið af sprengiefni.
Samkvæmt Lina Sinjab, útsendara BBC í Sýrlandi, var atburðarásin á þessa leið: Bíllin ók að rútunum og byrjaði að dreifa snarli til viðstaddra. Þetta athæfi fangaði vitaskuld athygli margra barna, sem söfnuðust saman í kringum bílinn. Síðan var hann sprengdur upp í framhaldinu – með þessum hroðalegu afleiðingum.
Lina bætir því við að það þyki sérkennilegt að farartækið hafi fengið inngöngu inn á svæðið án samþykkis ríkisstjórnarinnar.
Hægt er að leiða líkur að því að þarna sé einhver spilling á ferðinni og einræðisherra ríkisins, Assad, sé ábyrgur en hann hefur oft áður staðið fyrir árásum á sína eigin þegna. Enginn hefur þó hingað til lýst yfir ábyrgð á voðaverkinu.