Sökuð um að hafa misfarið með fé Evrópuþingsins
Yfirvöld í Frakklandi hafa kallað eftir því við Evrópuþingið að friðhelgi Marine Le Pen verði aflétt svo hægt sé að rannsaka meint fjársvik hennar. Le Pen, sem er leiðtogi Þjóðfylkingarinnar í Frakklandi og forsetaframbjóðandi, er sökuð um að hafa notað fjármuni Evrópuþingsins til að greiða eigin starfsfólki.
Le Pen er sökuð um að hafa notað um 40 milljónir króna sem átti að nýta til að standa straum af kostnaði við störf aðstoðarmanna á Evrópuþinginu til að greiða persónulegum aðstoðarmönnum sínum. Í mars var gerð húsleit á skrifstofum Þjóðfylkingarinnar af þessum sökum. Þá var Le Pen einnig boðuð til yfirheyrslu vegna málsins í síðasta mánuði. Því neitaði hún og vísaði til þess að hún nyti friðhelgi.
Fyrri umferð forsetakosninganna í Frakklandi fer fram 23. apríl næstkomandi. Le Pen háir harða baráttu við Emmanuel Macron, frambjóðanda En Marche! Samkvæmt síðustu skoðanakönnunum er vart sjónarmunur á milli frambjóðendanna tveggja, bæði njóta þau tæplega fjórðungs fylgis. Talið er nokkuð ljóst að þau komist í seinni umferð kosninganna þar sem kosið er á milli þeirra tveggja efstu. Tíðindi af meintum fjárdrætti Le Pen virðast lítil áhrif hafa haft þar á.