Spádómurinn um hinn komandi messías einkennir myndirnar – Trúarstef út um allt
Kvikmyndirnar um Tortímandann (e. Terminator) verða sýndar í einni beit í Laugarneskirkju í dag. Davíð Þór Jónsson, sóknarprestur við kirkjuna, hyggst þar benda á trúarstef sem sjá má í myndunum en þrjár myndir verða sýndar í dag. Sú fjórða bíður hins vegar seinni tíma.
Davíð Þór segir í samtali við DV að löng hefð sé fyrir fræðslu í kirkjunni á föstunni. Fólk komi saman og íhugi á föstudaginn langa. Það sé markmiðið með sýningunni á myndunum nú í dag, að fræða og benda á tengsl við krossfórnina. „Það eru trúarstef í ólíklegustu kvikmyndum og ég hef sérstaklega gaman af því að greina og benda á slík stef í myndum sem má segja að séu kannski ólíklegar, ekki myndir sem sýndar eru í Bíó Paradís eða hjá Græna ljósinu heldur einmitt Hollywood-kvikmyndir af þessu tagi. Ég hef flutt fyrirlestra um slíkt áður.“
Davíð Þór segir að þegar litið sé á menningu, hámenningu sem lágmenningu, komi í ljós að vart sé til nokkur frumleg hugmynd, allt sé sótt í sameiginlegan sjóð mennskunnar. „Við erum öll að fiska eftir stefjum og hugmyndum sem koma úr biblíunni, þó að þaðan geti þær verið komnar annars staðar frá. Þetta eru upprisan, þetta er spádómurinn um hinn komandi messías. Þetta sést í Tortímendamyndunum og ekki síst þeirri fyrstu. Þar er það spádómurinn um að Sarah Connor muni verða þunguð og fæða frelsara mannkyns.“
Davíð Þór segir að hann hafi fengið mjög jákvæð viðbrögð við fyrirhuguðum kvikmyndasýningum þó hann hafi líka orðið var við að ekki alveg öllum þyki við hæfi að kirkjan standi fyrir kvikmyndasýningum sem þessum. „Ég geri mér grein fyrir að þetta væri varla hægt á Eskifirði, þar sem fólk kannski vill og á rétt á að koma til kirkju á föstudeginum langa. Í Reykjavík er hins vegar val um fjölda annarra kirkna. Þess vegna bjóðum við fólki upp á þennan valkost, að koma til okkar og hugleiða fórnina, fórn í þágu annarra.“
Sýningarnar hefjast á fyrstu myndinni, Tortímandanum, klukkan þrjú í safnaðarheimili Laugarneskirkju, og standa sýningar fram á kvöld. Ekkert kostar inn, allir eru velkomnir og velkomið er að taka með sér nesti, popp og gos, ef vill.