Níu tonna sprengju varpað á yfirráðasvæði Íslamska ríkisins í Afganistan
36 vígamenn Íslamska ríkisins féllu þegar Bandaríkjaher varpaði því sem hefur verið kallað „móðir allra sprengja“ á jarðgangakerfi hryðjuverkasamtakanna í Afganistan í gær. Þetta er haft eftir varnarmálaráðuneyti Afganistan í erlendum fréttamiðlum. Samkvæmt upplýsingunum féllu engir óbreyttir borgarar í árásinni en þær upplýsingar ríma ekki við vitnisburð fólks á svæðinu, að því er t.a.m. breska blaðið Guardian greinir frá.
Sprengjan, sem ber heitið GBU-43/B, er hin allra stærsta sem til er í vopnabúri Bandaríkjahers, ef frá eru talin kjarnorkuvopn. Sprengjan er tæp níu tonn að þyngd og hefur slíkri sprengju aldrei fyrr verið varpað í hernaði. Eftir því sem fram kemur í tilkynningu varnarmálaráðuneytisins eyðilagði sprengjan hernaðarlega mikilvæg skotmörk, göng og felustaði.