Hefur sniðgengið sektir sem hann fékk fyrir uppátækið
Daninn Thor Nørgaard gæti átt yfir höfði sér fangelsisdóm fyrir að hafa málað húsið sitt blátt. Thor, sem er 75 ára, hefur til þessa sniðgengið sektir sem hann hefur fengið, með reglulegu millibili, eftir að hann málaði húsið árið 2011. Þá hefur hann engan hug á að borga þær. Því gæti málið endað svo að Thor verði dæmdur í fangelsi.
Thor býr í smábænum Næstved í Danmörku. Þar er kveðið á um það í deiliskipulagi að ekki megi mála hús blá. Málið hófst 2011 þegar nágrannar hans klöguðu hann til sveitarfélagsins fyrir að hafa málað húsið blátt.
Málið hefur farið fyrir undirrétt og landsrétt og þar tapaði Nørgaard málinu. Hann var dæmdur til að greiða 30.000 danskar krónur í sekt eða mála húsið eða sitja í fangelsi í 14 daga.
TV2 hefur eftir Thor að valið sé ekki erfitt. Hann sé á eftirlaunum og 30.000 krónur sé stór biti fyrir hann. Því sé það bara ágætur kostur að sitja sektina af sér í fangelsi.
Hjá sveitarfélaginu eru engar fyrirætlanir uppi um að breyta deiliskipulaginu fyrir svæðið sem Thor Nørgaard býr á. Því mun hann að öllum líkindum sitja dóminn af sér.