Forsvarsmenn rússneska ríkissjónvarpsins, Channel One, tilkynntu í dag að framlag Rússa mun ekki taka þátt í Euorvision keppninni sem fram fer í Kænugarði, í Úkraínu, þann 27. maí næstkomandi. Ástæðan er sú að ekki náðust sáttir við evrópsku sjónvarpsakademíuna sem og Úkraínumenn. Þá ætla Rússar ekki að sýna keppnina í rússnesku sjónvarpi.

Í mars greindu Úkraínumenn frá því að rússneski keppandinn, Yuliya Samoilova, fengi ekki að koma inn í landið næstu þrjú árin þar sem hún braut úkraínsk lög þegar hún heimsótti Krímskaga ólöglega árið 2015.

Rússneska utanríkisráðuneytið gaf frá sér yfirlýsingu í kjölfarið þar sem sagði að ákvörðunin væri kaldranaleg og ómanneskjuleg.