Sheila Abdus-Salaam fannst látin í Hudson-ánni í New York í gær
Sheila Abdus-Salaam, fyrsti íslamski kvendómari Bandaríkjanna, fannst látin í Hudson-ánni skammt frá heimili sínu í Harlem í New York í gær.
Samkvænt ónefndum heimildum dagblaðsins New York Post hafði fjölskylda dómarans leitað til lögreglu fyrr um daginn og lýst eftir henni. Um hádegi barst lögreglu svo tilkynning um manneskju sem flaut í ánni. Að sögn lögreglu var hún alklædd og engir augljósir áverkar á líkinu þegar það fannst, en ekki hefur verið skorið úr um hver dánarorsökin er.
Abdus-Salaam, sem var 65 ára, var mikill frumkvöðull í Bandarískja dómskerfinu. Árið 1994 varð hún fyrsta múslimakonan til að dæma við efsta dómstig í einu ríkja Bandaríkjanna. Árið 2013 settist hún svo í áfrýjunardómstól New York-ríkis og varð þar með fyrsta svarta konan til að gegna dómaraembætti í áfrýjunardómstól í einu ríkja Bandaríkjanna.