Alls óljóst hversu langan tíma málareksturinn tekur
Guðmundar- og Geirfinnsmálin verða lögð fyrir Hæstarétt fljótlega eftir páska. Endurupptökunefnd féllst í janúar á að taka bæri upp mál þeirra Sævars Ciesielski, Alberts Klahn Skaftasonar, Tryggva Rúnars Leifssonar, Kristjáns Viðars Júlíussonar og Guðjóns Skarphéðinssonar en þeir voru allir dæmdir fyrir aðild að hvörfum þeirra Guðmundar Einarssonar og Geirfinns Einarssonar árið 1974. Nefndin hafnaði hins vegar endurupptökubeiðni Erlu Bolladóttur.
Greint er frá þessu í Morgunblaðinu. Davíð Þór Björgvinsson, settur ríkissaksóknari í málunum segir í samtali við blaðið að þeir sem fóru fram á endurupptöku, og nefndin heimilaði að taka málin upp, verði gert að mæta fyrir Hæstarétt. Þeir fái síðan frest til að skila greinargerð í málinu.
Að sögn Davíðs eru einkum þrjár niðurstöður líklegar: að þess verði krafist að sakfellingarnar standi, að fallið verði frá ákæruliðum eða að saksóknari fallist á sýknukröfu. Málið sé umfangsmikið og ómögulegt sé að átta sig á hversu langan tíma það geti tekið.