Sökuðu hana um að hafa starfað sem fylgdardama samhliða fyrirsætuferlinum
Breska dagblaðið Daily Mail hefur fallist á að greiða Melaniu Trump, forsetafrú Bandaríkjanna, þrjár milljónir Bandaríkjadala í skaðabætur vegna fréttar sem birtist í aðdraganda forsetakosninganna Vestanhafs.
Í fréttinni var fjallað um feril Melaniu og því haldið fram að hún hefði eitt sinn starfað sem fylgdardama (e. escort), starfsgrein sem í umræðunni er oft tengd vændi.
Forsetafrúin höfðaði mál í febrúar síðastliðnum þar sem hún krafðist 150 milljóna dala í skaðabætur og afsökunarbeiðni. Sátt náðist um skaðabætur utan dómstóla og herma heimildir að hún nemi um 3 milljónum dala, eða um 330 milljónum króna. Daily Mail birtir í blaði sínu og vef í dag afsökunarbeiðni til Melaniu vegna umfjöllunarinnar. Fréttin var dregin til baka á sínum tíma.
Í afsökunarbeiðninni segir að Daily Mail hafi birt ásakanir um að Melania veitti þjónustu umfram það að sitja fyrir.
„Við viðurkennum að þessar ásakanir um Frú Trump eru ekki sannar.“ BBC greinir frá þessu.