Ekki hafa svo margir látist í umferðinni hér á landi frá árinu 2006
Út er komin slysaskýrsla Samgöngustofu fyrir árið 2016 og hana má nálgast í heild sinni á vef Samgöngustofu.
Á undanförnum tveimur árum hefur orðið ákveðinn viðsnúningur í annars jákvæðri þróun hvað varðar fækkun umferðarslysa árin þar á undan.
Síðastliðin tíu ár (2007-2016) hafa 126 manns látist í umferðinni á Íslandi en tíu ár þar á undan (1997-2006) létust 244.
Árið 2016 var mjög slæmt ár í umferðinni á Íslandi bæði hvað varðar fjölda látinna og slasaðra. Til að sá árangur sem hafði náðst í fækkun umferðarslysa fram að árinu 2015 tapist ekki þarf að bregðast strax og með markvissum hætti við þeirri aukningu sem orðið hefur á undanförnum tveimur árum hvað varðar fjölda banaslysa.
Alls létust 18 einstaklingar í jafnmörgum banaslysum í fyrra og hafa ekki svo margir látist í umferðinni hér á landi frá árinu 2006 en þá létust 31 í umferðinni. Flest slysin urðu á höfuðborgarsvæðinu.
Þrettán karlar létust og fimm konur. Þrír karlmenn létust vegna ölvunaraksturs og þrír karlmenn létust vegna fíkniefnaaksturs , þar af einn í slysi þar sem ölvun og fíkniefnanotkun var orsök slyssins. Engin kona lést vegna ölvunaraksturs eða fíkniefnaaksturs. Þrettán létust í dreifbýli en fimm í þéttbýli. Þrettán létust í fólksbifreið (tíu ökumenn og þrír farþegar), einn ökumaður vörubifreiðar, tveir bifhjólamenn og tveir fótgangandi.
21% aukning alvarlega slasaðra
Það er ekki aðeins að aukning sé í fjölda látinna heldur fjölgar slösuðum einnig talsvert mikið á milli ára.
Alvarlega slösuðum fjölgar úr 178 í 215 á milli ára og hafa ekki verið fleiri frá árinu 1999. Er þetta aukning upp á 21% á milli ára. Lítið slösuðum fjölgar úr 1130 í 1196 á milli ára eða um 6% og hafa þeir ekki verið fleiri frá árinu 2008. Alls fjölgar slösuðum og látnum úr 1324 í 1429 á milli ára eða sem nemur 8%. Samanlagður fjöldi slasaðra og látinna hefur ekki verið hærri frá árinu 2008.
14 íslendingar létust, 2 ferðamenn og 2 innflytjendur, þ.e. útlendingar með íslenska kennitölu. Af þeim 215 sem slösuðust alvarlega voru 151 Íslendingur, 47 erlendir ferðamenn og 17 innflytjendur. Á myndinni hér að neðan sést fjöldi og hlutfall Íslendinga og þeirra sem eru af erlendum uppruna í hópi þeirra sem létust eða slösuðust alvarlega.
Samanburður við hin Norðurlöndin
Í samanburði við hin Norðurlöndin er fjöldi látinna mestur hér á landi árið 2016 líkt og árið þar á undan. Erum við með flesta látna miðað við höfðatölu en fyrir árið 2015 gerðist það síðast árið 2006. Fæstir hafa látið lífið í umferðinni hér á landi á fimm árum af tíu í samanburði við Danmörku, Noreg, Svíþjóð og Finnland. (Sjá kafla 2.6.2 í skýrslunni). Það var árin 2007, 2008, 2010, 2012 og 2014.