Rakhmat Akilov ók á hóp fólks í Stokkhólmi á föstudag með þeim afleiðingum að fjórir létust
Rakhmat Akilov, 39 ára Úsbeki, játaði fyrir dómstólum í Svíþjóð í morgun að hafa ekið bifreið sinni á hóp fólks í Stokkhólmi á föstudag. Fjórir létust í árásinni. Akilov, sem er fjögurra barna faðir, er sagður hafa sagt við lögreglu að með árásinni hefði hann viljað hefna fyrir sprengjuregnið í Sýrlandi.
Aftonbladet hefur sagt frá því að Akilov hafi greint lögreglu frá því að hann hafi framfylgt skipunum frá liðsmönnum ISIS í Sýrlandi. Hann er sagður hafa viðurkennt við yfirheyrslur að vera liðsmaður ISIS og sagt að vestrænar þjóðir þyrftu að hætta loftárásum á Sýrland.
Akilov var dreginn fyrir dóm í morgun þar sem lögmaður hans, Johan Eriksson, játaði fyrir hans hönd. Akilov situr nú í gæsluvarðhaldi og bíður dóms.
Auk þeirra fjögurra sem létust slösuðust fimmtán þegar hann ók bíl sínum á hóp fólks við verslunarmiðstöð í Stokkhólmi. Saksóknari í málinu fór fram á að Akilov yrði látinn sæta einangrun meðan hann bíður þess að málið verði dómtekið. Þannig hefði hann ekki aðgang að sjónvarpi eða interneti og fengi ekki að hafa samband við umheiminn.
Um helgina var greint frá því að Akilov hefði sótt um hæli í Svíþjóð en verið synjað. Á umsókninni greindi hann frá því að hann hefði sætt pyntingum í heimalandi sínu, en það reyndist ekki á rökum reist. Hann er sagður hafa sótt um hæli árið 2014 og notað nafnið Rahmatgon Kurbonov. Á þeim forsendum, meðal annars, var honum synjað um hæli á sínum tíma.