Páll Valur Björnsson fyrrverandi þingmaður Bjartrar framtíðar er hættur í flokknum vegna óánægju með náið samstarf flokksins við Viðreisn. Páll Valur tilkynnti ákvörðun sína fyrir flokksmönnum í gær.

Vefsíðan Miðjan greinir frá því að nokkuð sé um óánægju með stjórnarsamstarfið innan Bjartrar framtíðar en Páll Valur er sá fyrsti sem segir sig úr flokknum vegna stjórnarsamstarfsins.

Páli Val þykir að flokkurinn hafi gefið of mikið eftir varðandi auðlindir, í Evrópumálum og hvað varðar börn.

Nú liggur fyrir Alþingi frumvarp sem á að bæta stöðu bágstaddra barna, sambærilegt frumvarpi sem Páll Valur flutti á síðasta kjörtímabili, en nú hyggst Björt framtíð ekki styðja frumvarpið, mun það hafa haft áhrif á ákvörðun hans að hætta í flokknum.