Ásmundur Friðriksson, þingmaður Sjálfstæðisflokksins, sendi útgerðinni og talsmanni hennar, Heiðrúnu Lind Marteinsdóttur, skýr skilaboð úr ræðustóli Alþingis í dag. Í umræðum um störf þingsins tók Ásmundur til máls og sagðist hafa verið talsmaður kvótakerfisins, „alla galla þess og auðvitað kosti.“

Hann sagði að það hefði komið sér á óvart þegar hann heyrði í talsmanni fyrirtækja í sjávarútvegi í gær, sem hafi sagt að greinin ætlaði að flytja vinnsluna úr landi.

Heiðrún Lind sagði við Stöð 2 í gær að vel gæti farið svo að vinnsla flyttist úr landi, en tilefnið eru áform HB Granda um að flytja fiskvinnslu frá Akranesi til Reykjavíkur. Tæplega hundrað manns gætu misst vinnuna.

„Við erum að sjá áhugasama aðila í Bretlandi. Þeir eru mjög samkeppnishæfir með þjónustu vegna þess að pundið er veikt. Þetta getur líka verið Austur-Evrópa og Asía. Þetta eru þeir staðir sem Noregur flytur fisk og fullvinnur. Þá er fiskurinn frystur, afþýddur, unninn og frystur á ný og fluttur til landa þar sem hann er seldur,“ sagði hún.

Tímabundinn vandi

Ásmundur er ekki sáttur. „Ég velti fyrir mér hvort greinin ætli að snúa baki við þeim gæðum fiskvinnslunnar sem fylgja því að nota ferska vatnið okkar og hreinleika íslenskrar náttúru, sem hefur verið eitt af aðalmerkjum útflutningsgreinarinnar. Og er talsmaðurinn búinn að gleyma hruninu, þegar gengið féll um tugi prósenta árið 2007?“ spurði hann og bætti við að þá hefðu tekjur útgerðarinnar margfaldast. Arðurinn og hagnaður greinarinnar hafi farið í sögulegar hæðir á sama tíma og kaupmáttur fólksins í landinu hrundi. „Á sama tíma hækkuðu skuldir fiskverkafólksins upp í rjáfur. Samt mættu allir í vinnu fiskvinnslufyrirtækin og stóðu sína plikt.“

Hann sagði að í dag væri við að etja tímabundið vandamál, en sterkt gengi krónunnar er útflutningsfyrirtækjum fjötur um fót þessa daganna. Hann er ósáttur við að þá komi talsmaður sjávarútvegsfyrirtækja og „hótar því að fara með vinnsluna úr landi. Flytja út fiskinn óunninn og vinna hann í útlöndum.“

Nóg af fólki á Íslandi

Hann sagði að á Íslandi væri nóg af fólki sem vildi veiða fiskinn og vinna hann. Þing og þjóð léti ekki hóta sér með þessum hætti. „Það hótar enginn okkur því að fara með fiskinn til útlanda. Það bara kemur ekki til greina. Ég trúi því ekki að stór hluti þeirra sem að hafa kvótann í höndunum taki undir þessi orð.“

Hann sagðist ekki geta annað en að svara þessum hótunum á sjómannamáli: „Þeir sem vilja fara með vinnsluna til útlanda þeir fari bara til andskotans.“ Á þeim orðum lauk hann ræðunni.

Forseti Alþingis, Unnur Brá Konráðsdóttir, sló af þessu tilefni í bjöllu og bað þingmenn um að gæta orða sinna.