Braut gegn stjúpdætrum
Héraðsdómur Reykjavíkur dæmdi í liðinni viku karlmann í tíu mánaða skilorðsbundið fangelsi fyrir kynferðislega áreitni gegn stjúpdætrum sínum. Brotin voru framin árið 2014. Maðurinn var meðal annars ákærður fyrir að káfa á stúlkunum innan og utan klæða.
Maðurinn játaði sök fyrir dómi en hann hefur ekki áður verið fundinn sekur um refsiverða háttsemi. Var það metið manninum til refsilækkunar að hann átti frumkvæði að því að greina frá brotum sínum og leita sér aðstoðar hjá sálfræðingi. Þá hafi hann á öllum stigum máls verið samvinnufús og sýnt iðrun. Í dómnum kom fram að maðurinn hefði flutt af heimilinu og sýnt einlægan vilja til að vernda stúlkurnar fyrir frekari skaða og öðlast innsæi í eigin hegðun, eins og það var orðað.
Maðurinn var sem fyrr segir dæmdur í tíu mánaða fangelsi en dómurinn er skilorðsbundinn til tveggja ára. Þá er frestun á fullnustu refsingar jafnframt bundin því skilyrði að hann sæki stuðningsviðtöl hjá sálfræðingi eins og ástæða þykir til og ekki sjaldnar en þrisvar á ári.