Heilsuleikskólinn Heiðarsel er í mikilli mengunarhættu – Leikskólastjórinn gift framkvæmdastjóra hjá United Silicon – Sagðist ekki tengjast kísilmálmverksmiðjunni á neinn hátt
„Við lýsum yfir þungum áhyggjum af mengun frá kísilveri Sameinaðs Sílikons hf. Í Helguvík. Heiðarsel og Heiðarskóli, ásamt hluta byggðar í Reykjanesbæ, eru staðsettir á svokölluðu þynningarsvæði verksmiðjunnar,“ segir í yfirlýsingu frá stjórn foreldrafélaga heilsuleikskólans Heiðarsels og stjórn foreldrafélags Heiðarskóla en undir hana rita tólf foreldrar barna í umræddum leik- og grunnskóla. Yfirlýsingin var send á alla foreldra barna í Heiðarseli og Heiðarskóla.
Það sem vekur athygli er að engar upplýsingar hafa borist frá heilsuleikskólanum Heiðarseli til foreldra varðandi umrædda mengun sem, samkvæmt skýrslu Umhverfisstofnunar, getur í „ákveðinni vindátt“ náð til byggðar og yfir bæði grunnskólann Heiðarskóla, þar sem eru um 400 nemendur, og leikskólann Heiðarsel, þar sem tæplega 100 börn eru vistuð. DV hafði samband við leikskólastjóra Heiðarsels þegar í ljós kom að um sextán mismunandi krabbameinsvaldandi efni, sjö þungmálmar og brennisteinn hafi mælst í sérstakri mælistöð sem er rúmlega sex hundruð metra frá leikskólanum.
Óskað var eftir viðbrögðum leikskólastjórans vegna alvarleika málsins.
Leikskólastjórinn, Hanna Málfríður Harðardóttir, brást ókvæða við og vildi ekkert láta hafa eftir sér um málið: „Ég vill ekkert að þú sért að gera einhverja frétt úr einhverri sögn frá mér. Ætlar þú að hafa eitthvað eftir mér í einhverri frétt? Ég vill ekkert að þú gerir það. Ætlar þú að segja að leikskólastjóri hefur áhyggjur af? Þetta er ekki neitt sem við höfum orðið var við hér?“
Tengist þú verksmiðjunni á einhvern hátt? Ég skil ekki alveg þennan tón í röddinni þinni?
„Nei. Ég skil ekki hvert þú ert að fara?“*
Ég var að útskýra fyrir þér að leikskólinn er á þynningarsvæði og eiturefnið arsen, sem hefur gríðarleg áhrif á heilsufar og þroska barna, og ég er að spyrja þig hvort þú hafir ekki áhyggjur af þessu?
„Auðvitað er þetta áhyggjuefni.“
Hvað ertu með mörg börn á leikskólanum hjá þér?
„Það eru 94 börn hér. Ég er bara búinn að vera eitt leikskólaár og veit ekki hvernig á undan hefur gengið,“ sagði Hanna Málfríður.
Við nánari eftirgrennslan kom í ljós að Hanna Málfríður hafði sagt ósatt þegar hún sagði við blaðamann að hún tengdist ekki verksmiðjunni á neinn hátt en hún er gift Kristleifi Andréssyni, framkvæmdastjóra öryggis- og umhverfissviðs United Silicon. Hún tengdist því verksmiðjunni þrátt fyrir að hafa sagt blaðamanni annað.
Þá ber þess að geta að samkvæmt öruggum heimildum DV hefur stæk brunalykt oftar en einu sinni umlukið leikskólann og sagði einn heimildarmaður DV að hann teldi öruggt að lyktin hefði borist inn í hann einnig. Hanna Málfríður sagði á móti að hvorki hún né starfsfólk skólans hefðu ekki orðið var við mengun af neinu tagi.
Einnig skal því haldið til haga að sama dag og DV birti frétt um umrædda arsen-mengun sem berst frá verksmiðjunni barst upplýsingapóstur til allra foreldra barna í leikskólanum Heiðarseli og barst hann rétt fyrir klukkan þrjú á föstudaginn. Ekki var þar einu orði minnst á mögulega hættu vegna mengunar frá verksmiðjunni.
Foreldrar í foreldrarfélögum í Reykjanesbæ eru áhyggjufullir og ákváðu að taka málin í sínar hendur vegna ástandsins. United Silicon sendi frá sér tilkynningu þar sem sagt var að rétt væri að skoða aðra möguleika sem hugsanlega mengunarvalda. Umhverfisstofnun svaraði tilkynningunni á þá leið að ekki kæmu aðrir til greina. [Þá hefur Ásmundur Friðriksson]http://www.dv.is/frettir/2017/3/28/asmundi-er-illa-brugdid-og-bidur-thjodina-afsokunar/) þingmaður Sjálfstæðisflokksins boðið þjóðina afsökunar á að hafa greitt götu fyrirtækisins.
Í fréttatilkynningu frá foreldrafélögunum segir:
„Samkvæmt skýrslu Umhverfisstofnunnar virðist gildi arsens, sem er eitrað efnasamband, langt yfir þeim mörkum sem gefin eru upp í mati á umhverfisáhrifum, eða allt að tuttugufalt meira. Í þessu ljósi taka stjórnir foreldrafélaga skólanna undir með bæjarstjórn Reykjanesbæjar, og telja óásættanlegt annað en að starfsemi kísilversins verði stöðvuð á meðan úrbætur á mengunarvörnum fara fram.“
Þá segir einnig í niðurlagi yfirlýsingarinnar að samfélagið eigi ætíð að fá að njóta vafans:
„Okkur er umhugað um velferð nemenda og starfsfólks skólanna.“