Alls hafa tæp 600 manns látist eða horfið á Miðjarðarhafinu það sem af er árinu
Fimmtíu og sex manns voru dæmd í sjö til tíu ára fangelsi í Egyptalandi í dag vegna dauða að minnsta kosti 202 flóttamanna á hafi úti í september síðastliðnum. Sakargiftirnar eru manndráp, vanræksla, notkun á bátum í leyfisleysi, að stefna börnum í hættu og skipulagning á ólöglegum fólksflutningum.
Báturinn, sem fólkið var um borð í, var á leið til Ítalíu þegar hann sökk við hafnarborgina Rosetta í miðjarðarhafinu þann 21. september síðastliðinn. Þeir sem lifðu af sögðu að um 450 flóttamenn hefðu verið um borð í bátnum þegar honum hvolfdi.
Egypski herinn sagði á sínum tíma að 163 manns hefði verið bjargað. Meirihluti þeirra voru Egyptar en þeirra á meðal var einnig fólk frá Súdan, Erítreu, Sýrlandi og Eþíópíu, samkvæmt upplýsingum frá Flóttamannastofnun Sameinuðu þjóðanna.
Flóttamannastofnunin sagði í febrúar að af þeim fjölda flóttamannaleiða sem farnar eru til Evrópu sé leiðin til Ítalíu hættulegust. Á árinu 2016 voru fleiri skráð andlát á Miðjarðarhafinu en nokkru sinni fyrr. „Af þeim 5096 flóttamönnum sem hafa látist eða verið skráðir týndir á síðasta ári höfðu 90% ferðast sjóleiðis til Ítalíu,“ segir í yfirlýsingu frá stofnuninni.
Ferðir til Ítalíu hafa margfaldast síðan samningur var gerður milli Tyrklands og Evrópusambandsins í mars í fyrra um að stöðva flóttamannastrauminn frá Tyrklandi yfir til Grikklands. „Síðan þá hefur leiðin frá Norður Afríku til Ítalíu verið aðal inngönguleiðin inn í Evrópu“ segir Flóttamannastofnunin.
Samkvæmt nýjustu tölum Flóttamannastofnunarinnar hafa 593 manns annað hvort dáið eða týnst á miðjarðarhafinu það sem af er þessu ári.