„Afkoman er í flestum tilfellum fokin út um gluggann“
Bílaleiga Akureyrar ætlar ekki að fjölga bílum í ár í fyrsta sinn frá árinum 2009. Viðskiptablaðið greinir frá.
Steingrímur Birgisson forstjóri Bílaleigunnar segir þetta vera afleiðingu styrkingar krónunnar. „Okkur líst illa á þróunina og ætlum að hafa vaðið fyrir neðan okkur. Við ætlum að bæta nýtingu flotans og vera þá bara fullbókuð í sumar ef svo ber undir en við ætlum ekki að elta toppinn ef svo má að orði komast.“
Steingrímur segir þó að sterk staða krónunnar hafi þó ekki áhrif á komur erlendra ferðamanna til landins í ár. Hún hafi aftur á móti áhrif á afkomu fyrirtækja í ferðaþjónstu. „Afkoman er í flestum tilfellum fokin út um gluggann. Hjá okkur hefur styrking krónunnar haft mikil áhrif. Við verðleggjum okkur í evrum en allur kostnaður er í krónum.“
Viðskiptablaðið greinir einnig frá því að stigið verði varlega til jarðar í bílakaupum hjá Hertz bílaleigunni á þessu ári. Sigfús B. Sigfússon, forstjóri Hertz, segir að fyrirtækið muni líklega fjölga bílum um 5-10% á þessu ári en undanfarin ár hefur floti leigunnar stækkar um um það bil 15% á milli ára.