Nokkrar af fréttaljósmyndum vikunnar af myndveitunni EPA
Leiðtogar stjórnmálaflokksins Sinn Fein bera Martin McGuinness, fyrrverandi varaforsætisráðherra heimastjórnar Norður-Írlands og áður foringja í írska lýðveldishernum, til grafar. McGuinness lést í vikunni 66 ára gamall.
Vegfarendur fylgjast með miklum reykjarmekki eftir að sprenging varð í birgðageymslu fyrir vopn á vegum úkraínska hersins. Atvikið varð nærri borginni Balakiya í Úkraínu. Eldur varð valdur að sprengingunni en hús voru rýmd í 20 kílómetra radíus umhverfis húsið. Það raskaði ró um 20 þúsund manns.
Boris Johnson, hinn litríki utanríkisráðherra Bretlands, tók til máls á fundi öryggisráðs Sameinuðu þjóðanna um ástandið í Sómalíu. Fundurinn fór fram í New York 23. mars. Hungursneyð ógnar lífi allt að 20 milljóna manna í fjórum löndum; Suður-Súdan, Sómalíu, Nígeríu og Jemen. Talið er að þrjár milljónir manna í Sómalíu séu í hættu. Talið er að um sex milljarða bandaríkjadala þurfi til að koma hungruðum til hjálpar.
Bókamessa í Þýskalandi
Talið er að 250 þúsund manns muni líta inn á bókamessunni í Leipzig í Þýskalandi, sem nú stendur yfir. Þar munu 3.400 kynna verk sín.
Laganna vörður leggur niður blóm í miðbæ Lundúna, til minningar um þá sem létust í hryðjuverkaárás í námunda við þinghúsið á miðvikudagskvöld. Fjórir létust, þar á meðal árásarmaðurinn, en 29 særðust.
Jeremy Corbyn, leiðtogi breska Verkamannaflokksins, minnist þeirra sem fórust í hryðjuverkaárásinni í Lundúnum á miðvikudag. Hér leggur hann blóm á Westminster-brúna.
Kínverskir hermenn marsera fram hjá mynd af Muhammad Ali Jinnah, stofnanda Pakistan, á þjóðhátíðardegi landsins í borginni Islamabad í Pakistan á fimmtudag.
Luca de Meo, framkvæmdastjóri bílaframleiðandans SEAT, ásamt stjórnarmönnum félagsins, ræða afkomu félagsins á blaðamannafundi í Barcelona á fimmtudag. Fyrirtækið hefur aldrei skilað meiri hagnaði – eða 232 milljónum evra – á síðasta ári.
