Breskir fjölmiðlar hlupu á sig í gær þegar greint var frá því að Abu Izzadeen hefði verið maðurinn sem framdi voðaverkin í London í gær.

Simon Israel, fréttamaður Channel 4, sagðist hafa heimildir fyrir því að hinn grunaði væri fyrrnefndur Izzadeen, en það reyndist ekki á rökum reist.

Izzadeen þessi situr nefnilega í fangelsi. Hann er talsmaður Al Ghurabaa, samtaka sem eru bönnuð í Bretlandi fyrir að hvetja til hryðjuverka og fagna slíkum árásum.

Fyrir nokkrum árum hlaut hann fjögurra og hálfs árs fangelsisdóm og í janúar í fyrra var hann dæmdur í tveggja ára fangelsi fyrir að hafa ætlað að yfirgefa Bretland, án þess að hafa til þess leyfi.

Simon sagði á Twitter-síðu sinni að hann hefði treyst heimildarmanni sínum en gert mistök með nafnbirtingunni.