Níu ára drengur í Phoenix í Arizona í Bandaríkjunum, Landen Lavarnia, lést eftir hörmulegt slys á heimili sínu á mánudag.
Landen var að leik með tveggja ára bróður sínum þegar hinn síðarnefndi handlék skotvopn á heimilinu. Ekki vildi betur til en svo að skot hljóp úr byssunni og í höfuð drengsins sem var úrskurðaður látinn á sjúkrahúsi í Phoenix.
Móðir bræðranna, Wendy Lavarnia, 28 ára, var handtekin og kærð vegna málsins. Hún sagði við lögreglu að hún hefði skilið hlaðið vopnið eftir á náttborði sínu í stutta stund. Á meðan hafi tveggja ára sonur hennar tekið byssuna með fyrrgreindum afleiðingum. Þá sagðist hún áður hafa leyft börnum sínum að leika með skotvopnið þegar engar byssukúlur voru í því.