Krókódílar hafa verið að gera íbúum margra svæða Simbabve lífið leitt að undanförnu í mikilli rigningatíð. Úrhellið hefur gert það að verkum að krókódílarnir hafa verið að færa út kvíarnar og herja á svæði sem þeir annars hefðu látið í friði.

Þessar heimsóknir geta haft skelfilegar afleiðingar eins og þorpsbúar í Mushumbi Polls í norðurhluta Simbabve fengu að reyna.

Meðfylgjandi myndband náðist eftir að þorpsbúarnir höfðu drepið risavaxinn krókódíl sem grunur lék á að hefði orðið átta ára gömlum dreng, sem var saknað, að bana.

Versti ótti þorpsbúanna varð síðan að veruleika þegar skepnan var skorin upp fyrir fyrir allra augum. Líkamsleifar drengsins unga voru meðal þess sem fundust í iðrum krókódílsins.

Líkamsleifum drengsins var safnað saman og útför haldin í þorpinu tveimur dögum síðar.