Halldór Viðar segir að ásakanirnar séu uppspuni frá rótum
Alræmdur fjársvikari, Halldór Viðar Sanne, náði að svíkja 300 þúsund krónur af grunnlausri konu á dögunum. Konan, Bergljót Snorradóttir, segir að hún hafi greitt Halldóri Viðari, sem nú er skráður sem Hafsteinsson, fyrirframgreiðslu vegna einbýlishúss sem að hún ætlaði að taka í leigu af honum. Síðar hafi komið í ljós að Halldór Viðar væri ekki eigandi hússins. Visir.is greinir frá. Þar kemur fram að Bergljót stígi fram til þess að vara aðra við hinum „siðblinda manni“.
Aðspurður segir Halldór Viðar að Bergljót sé lygari sem að sé að nota fortíð hans til að klekkja á sér.
DV greindi frá því í apríl 2013 að Halldór Viðar hefði verið dæmdur í tveggja og hálfs árs fangelsi í Danmörku fyrir margskonar fjársvik. Alls var hann dæmdur fyrir 97 brot. Hann var talinn hafa svikið 600-800 iPhone-síma út úr fólki. Það gerði hann með því að fá fólk til þess að fjárfesta í símum á raðgreiðslusamningi og sagði fólki að það gæti grætt töluverðan peningaupphæð með því að selja símana á Íslandi. Fólkið sem keypti símana fékk hins vegar aldrei sinn skerf af gróðanum. Halldór var talinn hafa svikið um 110 milljónir af fólki. Rannsókn málsins var afar umfangsmikil enda þurfti lögregla að ná tali af öllum þeim sem hann hafði svikið. Að lokinni afplánun dómsins var Halldór Viðar gerður brottrækur frá Danmörku.
Í fyrrnefndri frétt Visir.is kemur fram að Halldór ætli sér stóra hluti í fyrirtækjarekstri. Hann sé að reyna að koma upp fyrirtækinu TimeShareIceland og auglýsir eftir meðeiganda af fyrirtækinu. Fyrirtækið, sem á að vera hið fyrsta sinnar tegundar hérlendis, mun bjóða útlendingum að eignast hluta í fasteignum á Íslandi á mjög sanngjörnu verði. Þannig geti fólk keypt hluta í húsi og notað það hluta úr ári. Fram kemur að fyrirtækið eigi enga fasteign eins og er en það sé einungis tímaspursmál þar til að fyrsta fasteignin verði keypt.