Hilmar tapaði 106 þúsund krónum á fimm mínútum: Hvetur fólk til að fara varlega

Eitthvað sem getur komið fyrir alla

Aðeins nokkrar mínútur liðu þar til þjófarnir náðu rúmum 100 þúsund krónum af kortinu hans.
Tók enga stund Aðeins nokkrar mínútur liðu þar til þjófarnir náðu rúmum 100 þúsund krónum af kortinu hans.

„Ég var hvergi með PIN-númerið nema í hausnum á mér,“ segir Hilmar Kristensson í viðtali við DV, en hann lenti í leiðinlegu atviki fyrir skemmstu.

DV fjallaði í vikunni um þær nýstárlegu aðferðir sem þjófar nota til að verða sér úti um skjótfenginn gróða. Í greininni voru birt nýleg dæmi frá London þar sem þjófar koma litlum myndavélum og afritunarbúnaði fyrir á hraðbönkum. Þannig tókst þeim að afrita kortin og komast yfir PIN-númerin á þeim.

Tók af honum veskið

Atvikið sem Hilmar lenti í átti sér stað í desember í Kaupmannahöfn þegar hann var á aðallestarstöðinni í borginni. Hilmar var á leið til Glostrup og keypti hann miða í sjálfsala á lestarstöðinni.

„Ég lenti í einhverju basli með sjálfsalann og fór í þann næsta þar sem ég gat keypt miða,“ segir Hilmar sem þurfti að slá inn PIN-númer. Að svo búnu gekk hann niður og beið eftir lestinni í stutta stund. Þegar kom að því að ganga inn í lestina veitti Hilmar því athygli að nokkrir menn ruddust fram fyrir hann.

„Svo sneru þeir við og komu aftur,“ segir Hilmar og bætir við að þá virðist einum úr hópnum hafa tekist að ná af honum veskinu. Þegar kom að því að framvísa miðanum í lestinni áttaði Hilmar sig á því að veskið var horfið eins og miðarnir í lestina.

Kortinu lokað strax

„Ég hringdi strax í bankann og kortinu var lokað,“ segir Hilmar og bætir við að líklega hafi um fimm mínútur liðið frá þjófnaðinum þar til hann uppgötvaðist. En á þessum stutta tíma tókst þjófunum að taka um 106 þúsund krónur út af kortinu, eða tvö þúsund krónur danskar í þrjú skipti.

„Það er jafnvel haldið að þeir hafi verið með myndavél einhvers staðar,“ segir Hilmar og bætir við að til marks um það hafi hann hvergi verið með PIN-númerið nema í kollinum. Einnig er þekkt að þjófar fylgist með þegar PIN-númerið er slegið inn, steinsnar frá viðkomandi án þess að mikið beri á. Eins og dv.is greindi frá eru þjófar í auknum mæli farnir að setja myndavélabúnað á hraðbanka. Lundúnalögreglan hefur fengið nokkur slík dæmi inn á borð til sín undanfarna mánuði.

Algjörir fagmenn

Hilmar segir að þjófarnir hafi reynt að ná enn hærri upphæð af kortinu um það leyti sem hann hringdi í bankann til að láta loka kortinu. „Þeir reyndu að taka 20 þúsund krónur danskar af kortinu þegar ég var að tala við starfsmann bankans. Þetta eru algjörir fagmenn,“ segir Hilmar sem hvetur fólk til að fara varlega – þjófar sem þessir hlífi engum. Hilmar segist hafa tilkynnt málið til dönsku lögreglunnar en lítið komið út úr því. „Ég hitti lögreglumann sem sagði að það þýddi ekkert að spá í þetta.“ Þá hafi hann þurft að bera fjárhagslegt tjón sjálfur þar sem þjófarnir notuðu PIN-númer kortsins.

Hafðu þetta í huga

Hafðu þetta í huga

Á vef Samtaka fjármálafyrirtækja má finna öryggisreglur sem gott er að hafa í huga. Þetta á til dæmis við þegar peningar eru teknir út úr hraðbönkum, notast er við greiðslukort í verslunum eða í sjálfsölum.

1) Vertu á varðbergi gagnvart grunsamlegri hegðun ókunnugra í grennd við hraðbankann.

2) Ef þú verður var við grunsamlega hegðun hættu við aðgerðir í hraðbankanum og notaðu hraðbankann seinna.

3) Legðu PIN-númerið þitt vel á minnið og ekki bera á þér minnisblöð þar sem PIN-númerið er skrifað niður. Ekki láta neinn fá PIN-númerið þitt (hvorki ókunnuga, bankastarfsmenn, lögreglu o.s.frv.). Öryggi PIN-númersins er á ábyrgð korthafa.

4) Vertu á varðbergi gagnvart einstaklingum sem eru að reyna að sjá innslátt PIN-númers við hraðbanka og gættu þess að enginn geti séð innslátt PIN-númersins. Settu aðra hönd þína yfir takkaborðið og notaðu sem skjöld fyrir hina höndina sem slær inn PIN-númerið.

5) Notaðu líkama þinn til að byrgja ókunnugum sýn þegar þú slærð inn PIN-númerið.

6) Tilkynntu umsvifalaust þjónustuveri banka, sparisjóðs eða kortafyrirtækis um stolin eða týnd kort.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.