Fangi á Hólmsheiði: „Það er farið illa með mig hérna“

Fær ekki að sækja sjúkraþjálfun eftir skurðaðgerð

Segir að illa sé farið með sig á Hólmsheiði þar sem hann fær ekki að sækja nauðsynlega sjúkraþjálfun eftir hryggjaraðgerð sem hann undirgekkst. Í svari Fangelsismálastofnunar kemur fram að læknar meti hvort fangar hafi þörf á slíkri þjónustu og sé það raunin þá sjái starfsmenn fangelsisins til þess.
Þorbjörn Haukur Liljarson Segir að illa sé farið með sig á Hólmsheiði þar sem hann fær ekki að sækja nauðsynlega sjúkraþjálfun eftir hryggjaraðgerð sem hann undirgekkst. Í svari Fangelsismálastofnunar kemur fram að læknar meti hvort fangar hafi þörf á slíkri þjónustu og sé það raunin þá sjái starfsmenn fangelsisins til þess.

Þorbjörn Haukur Liljarson, fangi á Hólmsheiði, segir farir sínar ekki sléttar af samskiptum sínum við Fangelsismálastofnun og lækna á Hólmsheiði. Nýverið fór hann í bráðnauðsynlega aðgerð á hrygg og átti að dveljast í nokkra mánuði á Grensási til að jafna sig. Þorbjörn Haukur missteig sig og datt í það á sjúkrabeði og refsingin var sú að hann var sendur aftur á Hólmsheiði. „Ég viðurkenni fúslega að ég missteig mig en viðbrögð Fangelsismálastofnunar eru alltof harkaleg. Þetta er of hörð refsing fyrir eitt feilspor. Ég er fárveikur og á að vera á sjúkrahúsi en ekki í fangelsi. Það er verið að fara illa með mig,“ segir Þorbjörn Haukur Liljarson í samtali við DV.

Hann segist ekki fá að fara í sjúkraþjálfun og allur gangur sé á því hvort læknarnir, sem koma í fangelsið tvisvar í viku, vilji yfir höfuð hitta hann. Í svari frá Fangelsismálastofnun kemur fram að stofnunin geti ekki tjáð sig um einstök mál en að fangar eigi rétt á sömu heilbrigðisþjónustu og aðrir. Þá meti læknar þörf fanga á þjónustu eins og sjúkraþjálfun. Ef þeir gefi grænt ljós þá sjái starfsmenn fangelsisins um að flytja fangann þangað sem þjónustan er veitt.

Mynd: DV ehf / Sigtryggur Ari

Hætti að geta gengið

Þorbjörn Haukur afplánar nú eftirstöðvar fangelsisdóms á Hólmsheiði. Þann dóm hlaut hann fyrir líkamsárás gegn þáverandi kærustu sinni en Þorbjörn Haukur var í mikilli óreglu á þeim tíma. Alls hefur hann hlotið 19 dóma fyrir margs konar brot frá árinu 1990. „Ég á mína svörtu fortíð sem ég þarf að takast á við. Ég er reyna að vera edrú og snúa við blaðinu. Þrátt fyrir fortíð mína þá er ekki þar með sagt að það megi brjóta á mér mannréttindi,“ segir Þorbjörn Haukur.

Síðan á ég að vera í sjúkraþjálfun daglega en það er enginn sem skutlar mér þangað.

Að sögn Þorbjörns Hauks fór hann að finna fyrir doða í höndum og fótum fyrir nokkru. „Ég hætti að finna fyrir fótunum. Smátt og smátt versnaði ég og að lokum var ég orðinn rúmliggjandi,“ segir hann. Rannsókn leiddi í ljós að ómeðhöndlaður áverki sem hann hlaut vegna mótorhjólaslyss fyrir rúmum tveimur áratugum hafði valdið þrýstingi á mænuna. Þorbjörn Haukur var drifinn í aðgerð og fékk frestun á afplánun fangelsisdómsins. „Það voru festir saman á mér þrír efstu hryggjarliðirnir með skrúfum og plötum auk þess sem hreinsað var út úr efsta liðnum. Læknirinn sagði við mig að ef þetta hefði dregist í hálft ár í viðbót þá hefði ég ekki gengið aftur og líklega misst allan mátt í höndunum einnig. Það var talsvert áfall,“ segir Þorbjörn Haukur. Aðgerðin heppnaðist vel og varð til þess að hann gat gengið aftur.

Átti að vera í sjúkraþjálfun í allt að tvö ár

Hann átti síðan að jafna sig á Grensás og ná fyrri heilsu með reglulegri sjúkraþjálfun. Hann hafði aðeins dvalið á Grensás í rúma viku þegar hann brá sér af deildinni til þess að hitta konuna sína. „Það endaði með hávaðarifrildi og þá gerði ég þau mistök að detta í það,“ segir Þorbjörn Haukur. Þegar upp um hann komst var hann handtekinn og látinn hefja afplánun aftur á Hólmsheiði. Þau viðbrögð telur hann afar harkaleg og óttast að hann fái ekki bót meina sinna þar.

„Ég fæ aðeins væg verkjalyf frá fangavörðum sem slá ekkert á verkina. Síðan á ég að vera í sjúkraþjálfun daglega en það er enginn sem skutlar mér þangað. Fyrir aðgerðina var mér tjáð að ég þyrfti líklega að vera í sjúkraþjálfun í allt að tvö ár. Hérna kemst ég ekki í neitt slíkt,“ segir Þorbjörn Haukur. Að hans sögn finnur hann ekki fyrir fótum sínum auk þess sem hann er dofinn í fingrunum. „Samfangar mínir hafa aðstoðað mig við að skera niður matinn því ég get það ekki sjálfur. Ég get gengið á sléttu yfirborði og ég get horft fram fyrir mig. Undanfarið hef ég ekki getað farið út þegar það er leyft því að ég get ekki gengið í snjónum. Ég dett bara fram fyrir mig,“ segir Þorbjörn Haukur.

Fangelsismálastofnun segir að þeir fái þjónustu sem þurfi

Læknar heimsækja Hólmsheiði tvisvar í viku og Þorbjörn Haukur segir farir sínar ekki sléttar af þeim. „Fyrst þegar ég kom til baka þá hæddist læknirinn að mér fyrir að hafa dottið í það. Síðan hafa þeir neitað að hitta mig í nokkur skipti,“ segir Þorbjörn Haukur en læknar á Hólmsheiði vega og meta hvaða fanga þeir hitta þegar heimsóknir standa yfir, tvisvar í viku. „Ég er sárkvalinn og ég tel að verið sé að fremja á mér gróft mannréttindabrot,“ segir Þorbjörn Haukur.

Í skriflegu svari frá Fangelsismálastofnun kemur fram að ekki sé hægt að fjalla um einstök mál fanga. Almennt eigi fangar rétt á sambærilegri heilbrigðisþjónustu og aðrir. „Í þessu felst meðal annars að þeir eiga rétt á að fara til sjúkraþjálfara, sé þess þörf samkvæmt mati læknis. Í slíkum tilvikum eru þeir keyrðir til og frá af fangaflutningsmönnum. Þá skal læknir skoða fanga við upphaf afplánunar og ef þörf krefur meðan á afplánun stendur. Læknir kemur reglulega í fangelsin og metur hverju sinni við hverja hann talar í það skiptið. Það er því alveg á hreinu að ef læknir telur þörf á að fangi fari til sjúkraþjálfara þá sér viðkomandi fangelsi um að koma honum þangað,“ segir Erla Kristín Árnadóttir, sviðsstjóri fullnustusviðs Fangelsismálastofnunar.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.