Húsnæðisverð í heiminum hefur hvergi hækkað meira en á Íslandi undanfarin misseri. Hækkunin frá fjórða ársfjórðungi 2015 til loka fjórða ársfjórðungs 2016 nam 14,7 prósentum. Þetta er samkvæmt Knight Frank-húsnæðisvísitölunni fyrir árið 2016 sem birtist á dögunum.
Það var hagfræðingurinn Ólafur Margeirsson sem vakti athygli á þessu á Twitter-síðu sinni í morgun:

Efst í fyrsta skipti

Í skýrslunni kemur fram að Ísland sé nú í efsta sæti listans í fyrsta skipti frá því að hann hóf göngu sína árið 2006. Þá tólf mánuði sem listinn tekur til hækkaði húsnæðisverð um tæp 15 prósent hér á landi, en þar á eftir koma Nýja-Sjáland (12,7%), Malta (12,4%), Kanada (12,3%), Tyrkland (12,2%) og Litháen (11,6%). Hér má sjá skýrsluna í heild.

Haldið áfram að hækka

Hafa ber í huga að það sem af er þessu ári hefur húsnæðisverð á Íslandi haldið áfram að hækka. Í umfjöllun á vef Greiningar Íslandsbanka í lok febrúar kom fram að hækkunin síðustu tólf mánuði næmi 16 prósentum sem rímar við það sem fram kemur í skýrslunni.

Í skýrslunni kemur fram að húsnæðisverð á heimsvísu hafi hækkað um sex prósent að meðaltali, en árið 2015 nam hækkunin 4,1 prósenti. Þá segir að hækkunina á Íslandi megi rekja til betra efnahagsástands, aukins hagvaxtar og aukinnar eftirspurnar eftir húsnæði.

Einkenni þenslu

Fjölmiðlamaðurinn Egill Helgason gerir skýrslu Knight Frank að umtalsefni í bloggfærslu á Eyjunni, en yfirskrift pistilsins er: Viljum við eiga þetta met?
Þar vísar Egill í Twitter-færslu Ólafs og bætir við að húsnæðisverð hafi haldið áfram að hækka á Íslandi undanfarnar vikur og mánuði. „Mikil spurning hvort við kærum okkur um að eiga þetta met?,“ spyr Egill.

Í áðurnefndum pistli á vef Greiningar Íslandsbanka kom fram að íbúðamarkaðurinn hér á landi beri mörg einkenni þenslu. „Fyrir utan mikla hækkun á íbúðaverði hefur heildarfjöldi íbúða á söluskrá ekki verið minni svo langt sem gögn Þjóðskrár Íslands ná. Undir lok síðastliðins árs voru 920 íbúðir auglýstar til sölu, en þeim hafði þá fækkað um 35% frá lokum árs 2015. Einnig mældist meðalsölutími íbúða 1,6 mánuðir í lok síðastliðins árs og er það lægsti meðalsölutími sem mælst hefur síðan mælingar á þeim þætti hófust í ágúst 2006.“