Flugfélagið tapaði 1,7 milljörðum fyrstu þrjú rekstrarárin – Hagnaður síðustu tveggja ára 5,4 milljarðar – Sjáðu tölurnar
Flugfélagið WOW air hefur hagnast um alls 5,4 milljarða króna síðustu tvö ár eftir að hafa tapað alls tæplega 1,7 milljörðum króna fyrstu þrjú rekstrarár sín. Gríðarlegur viðsnúningur hefur orðið á flugfélaginu en á síðasta árið nam hagnaður þess 4,3 milljörðum króna. Vöxtur félagsins hefur einnig verið ör og ljóst að flugfélagið fer nú með himinskautum í kjölfar stóraukins fjölda ferðamanna sem koma til Íslands.
WOW air greindi frá afkomu sinni árið 2016 í dag þar sem fram kemur að tekjur félagsins hafi numið 36,7 milljörðum króna sem er 111% aukning miðað við árið á undan en þá námu þær 17 milljörðum króna.
Rekstarhagnaður fyrir afskriftir, fjármagnsgjöld og tekjuskatt (EBITDA) var 5,6 milljarðar króna og jókst um 3,2 milljarða milli ára.
Rekstarhagnaður félagsins árið 2016 var 3,7 milljarðar króna samanborið við 1,5 milljarð árið 2015.
Á síðasta ári bætti félagið sjö þotum við flotann og var með tólf þotur í rekstri í lok ársins; tvær Airbus A320, þrjár Airbus A330 breiðþotur og sjö Airbus A321. Fjórar af þessum þotum eru í eigu félagsins. Í ár mun WOW air bæta við sig fimm glænýjum Airbus þotum og verður þá floti félagsins orðinn 17 þotur. Þess ber að geta að félagið byrjaði með tvær þotur, árið 2012 eins og sjá má í töflunni hér fyrir neðan.
Árið 2016 flutti WOW air 1.668.773 farþega en það er 130% fjölgun farþega frá árinu áður. Í ár gerir félagið ráð fyrir því að fljúga með um 3 milljónir farþega. Heildarsætanýting árið 2016 var 88% en árinu áður var heildarsætanýtingin 86%. Á árinu flaug félagið til yfir þrjátíu áfangastaða beggja vegna Atlansthafsins.
Fjölda áfangastaða WOW air í Norður-Ameríku fjölgaði úr tveimur í sjö á síðasta ári. Síðastliðið vor hóf félagið áætlunarflug til vesturstrandar Bandaríkjanna; til Los Angeles og San Francisco. Síðan flug hófst til vesturstrandarinnar hefur fjöldi farþega frá borgunum tveimur aukist um 340%. Einnig hóf félagið flug allan ársins hring til kanadísku borganna Toronto og Montréal en síðan þá hefur fjöldi ferðamanna frá Kanada aukist um 78% á milli ára. New York bættist svo við leiðarkerfið í lok nóvember á síðasta ári.
Á síðasta ári störfuðu um 720 manns hjá WOW air sem er 157% starfsmannaaukning frá árinu áður en árið 2015 störfuðu 280 manns hjá félaginu. Í ár, 2017 er gert ráð fyrir að starfsmannafjöldi félagsins verði um 1100 manns.
Í töflunum hér fyrir neðan má sjá hversu mjög umsvif WOW air hafa aukist og hversu ör þróunin hefur verið.
WOW | Hagnaður/ -Tap |
---|---|
2016 | 4,3 milljarðar |
2015 | 1,1 milljarður |
2014 | -560 milljónir |
2013 | -330 milljónir |
2012 | -794 milljónir |
Árið 2012 var fyrsta heila rekstrarár WOW air.
WOW | 2012 | 2013 | 2014 | 2015 | 2016 | 2017 |
---|---|---|---|---|---|---|
Fjöldi starfsmanna/ heildarfjöldi | 70 | 150 | 185 | 280 | 720 | 1100 |
Fjöldi starfsmanna/ flugáhafnir | 55 | 120 | 140 | 190 | 540 | 800 |
Fjöldi áfangastaða í Evrópu | 13 | 14 | 14 | 17 | 20 | 20 |
Fjöldi áfangastaða í N-Ameríku | 0 | 0 | 0 | 2 | 6 | 9 |
Fjöldi véla í flota | 2 | 3 | 4 | 5 | 12 | 17 |
Farþegar | 111.400 | 421.000 | 495.000 | 730.000 | 1.660.000 | 3.000.000 |
Fjöldi fluga í áætlun hvert ár | 1050 | 2950 | 3500 | 4670 | 9000 | 16000 |
Tölur fyrir 2017 eru áætlanir WOW, þar sem við á.