„Pabbi, loksins er komið að því!“
„Við systkinin getum loksins fagnað því að mannorð þitt verður hreinsað,“ segir Hafþór Sævarsson á Facebook-síðu sinni og en færsla hans hefst á þessum orðum:
„Pabbi, loksins er komið að því!“
Endurupptökunefnd hefur birt úrskurði sína er varða mál sexmenninganna sem dæmd voru fyrir aðild sína að hvarfi Guðmundar Einarssonar og Geirfinns Einarssonar árið 1974. Fallist er á að taka eigi upp dóma í málum þeirra Sævars Ciesielski, Kristjáns Viðars Júlíusonar, Guðjóns Skarphéðinssonar, Tryggva Rúnars Leifssonar og Alberts Klahn Skaftasonar en ekki dóm í máli Erlu Bolladóttur.
Sævar eignaðist fimm börn en þau heita Júlía Marinósdóttir, Hafþór Sævarsson, Sigurþór Sævarsson, Victor Blær Jensen, Lilja Rún Jensen. Hafþór segir að málið hafi litað tilveru þeirra allra og segir hann að ekki sé mögulegt að útskýra þá upplifun í orðum að hafa fæðst inn í „þetta ranglæti.“
„Faðir okkar barðist alla ævi fyrir sannleikanum í þessum málum og að sakleysi hans yrði viðurkennt. Mannshvörf tveggja manna voru misnotuð af rannsóknaraðilum. Við vildum óska þess að pabbi væri með okkur í dag en svo er því miður ekki.
Endurupptökunefnd fellst á að Guðmundar- og Geirfinnsmál, sem aldrei voru dómtæk mál, verða tekin upp að nýju. Þá fellst nefndin ekki á að taka upp rangar sakargiftir á þessum tímapunkti; þær falla um sig sjálfar með sýknudómi. Kærar þakkir, þið öll sem hafið stutt okkur allan þennan tíma.
Til hamingju pabbi, barátta þín og seigla hefur loksins skilað sér í endurupptöku. Réttlætið sigrar að lokum.“