DV fær tvær tilnefningar til blaðamannaverðlauna Blaðamannafélags Íslands, fyrir árið 2016. Auður Ösp Guðmundsdóttir er tilnefnd í flokknum viðtal ársins fyrir viðtal við Margréti Fenton en dóttir hennar, Sandra Sigrún, var dæmd til 37 ára fangelsisvistar í Bandaríkjunum.
Hörður Ægisson er tilnefndur í flokki rannsóknarblaðamennsku fyrir umfjöllun um bónusgreiðslur til slitastjórna Kaupþings og ALMC en þær voru greiddar út í kjölfar nauðasamninga og samninga um stöðugleikaframlag.
RÚV fær flestar tilnefningar, þrjár talsins. DV og Morgunblaðið fá tvær, Stundin, Kjarninn, Fréttablaðið, Stöð 2 og Reykjavík media fá sína tilnefninguna hvert.
Verðlaunin verða afhent á laugardaginn eftir viku, þann 4. mars.
Hér má sjá allar tilnefningarnar:
Auður Ösp Guðmundsdóttir, DV. Fyrir viðtal við Margréti Fenton um örlög dóttur hennar, Söndru Sigrúnar, sem afplánar nú 37 ára fangelsi fyrir vopnuð rán í Bandaríkjunum.
Helgi Seljan, Kastljósi RÚV.
Fyrir viðtal við hjónin Sigrúnu Eyrúnu Friðriksdóttur og Karl Olgeirsson um barnsmissi sem þau urðu fyrir vegna mistaka í fæðingu á Landspítalanum.
Ingibjörg Dögg Kjartansdóttir, Stundinni.
Fyrir viðtal við Berglindi Ósk Guðmundsdóttur sem segir sögu systur sinnar, Kristínar Gerðar, sem svipti sig lífi eftir áralanga baráttu við eiturlyfjafíkn og afleiðingar misnotkunar.
Hörður Ægisson, DV.
Fyrir umfjöllun um milljarða bónusgreiðslur slitastjórna Kaupþings og ALMC sem greiddar voru í kjölfar nauðasamninga og samninga um stöðugleikaframlag.
Tryggvi Aðalbjörnsson, RÚV.
Fyrir umfjöllun um brot Brúneggja ehf. gegn dýravernd og svik við neytendur og máttleysi eftirlitsstofnana til að takast á við brotin.
Þórður Snær Júlíusson, Kjarnanum.
Fyrir fréttaskýringar um skiptingu auðs á Íslandi og misskiptingu gæða þrátt fyrir lítinn launamun í alþjóðlegum samanburði .
Guðrún Hálfdánardóttir, Mbl.is
Fyrir fréttaskýringar um Sýrland, vaxandi þjóðernishyggju í tengslum við flóttamenn þaðan og lítinn áhuga ráðamanna í Evrópu fyrir að taka á móti þeim.
Sigrún Ósk Kristjánsdóttir, Stöð 2 Fyrir þáttaröðina Leitin að upprunanum sem segir sögu þriggja ættleiddra kvenna og árangursríka eftirgrennslan landa á milli um rætur þeirra.
Svavar Hávarðsson, Fréttablaðinu
Fyrir fréttaröð um náttúruperluna Mývatn, þar sem mengun er margfalt yfir viðmiðum Alþjóðaheilbrigðisstofnunarinnar, líkast til af mannavöldum.
Jóhanna Vigdís Hjaltadóttir, RÚV.
Fyrir skilmerkilega umfjöllun um íslensk stjórnmál og vandaðar fréttaskýringar af störfum Alþingis, ekki síst á tímum pólitísks óróa.
Jóhannes Kr. Kristjánsson, Reykjavík Media.
Fyrir ítarlegar rannsóknir á þeim hluta Panamaskjalanna sem vörðuðu íslenska hagsmuni og umfjöllun, í samstarfi við aðra miðla, um mikil viðskipti í skattaskjólum.
Ragnar Axelsson og Orri Páll Ormarsson, Morgunblaðinu.
Fyrir áhrifamikla umfjöllun um áhrif loftslagsbreytinga á Norðurslóðum og sérstaklega hvernig þær breyta lífinu á túndrum Síberíu.