Mundi alls ekki nafn samþingmanns – Kallaðu mig „herra Proppé“
Jón Þór Ólafsson, þingmaður Pírata, lenti í brasi í ræðustól Alþingis nú rétt fyrir hádegi þegar hann tók þátt í sérstökum umræðum um samgöngur á höfuðborgarsvæðinu. Vildi Jón Þór þar vísa til ræðu fyrri þingmanns en gat alls ekki munað nafn hans. Uppskáru tilraunir Jóns Þórs hlátur úr þingsal og sjálfur hló hann dátt.
Þingmaðurinn sem Jón Þór var að vísa til er Kolbeinn Óttarsson Proppé, þingmaður Vinstri grænna. Jón Þór fór með flestar útgáfur að nafni hans aðrar en þá réttu. „Eins og háttvirtur þingmaður Óttarr, nú man ég aldrei nafnið hans, eh, Proppéson, fyrirgefðu, Kolbeinn Óttarr Proppé, Kolbeinn Proppé. Ég get þetta ekki,“ sagði Jón Þór og hló að vandræðum sínum. Kallaði þá Kolbeinn sjálfur frammí úr þingsal og sagði að rétt væri að Jón Þór nefndi hann bara „herra Proppé“.