Alþjóðaólympíunefndin kemur saman í september næstkomandi þar sem keppnisstaður fyrir Ólympíuleikana árið 2024 verður ákveðinn.

Borgaryfirvöld í Búdapest í Ungverjalandi tilkynntu í gær að þau hefðu dregið umsókn sína um að halda leikana til baka. Það þýðir að eftir standa París og Los Angeles.

Árið 2015 tilkynntu bæði borgaryfirvöld í Boston og Hamburg að þau myndu ekki sækjast eftir því að halda leikana og Róm dró umsókn sína til baka í fyrrahaust.

Rúmlega 250 þúsund Ungverjar skrifuðu undir áskorun þess efnis að yfirvöld í Búdapest myndu draga umsókn sína til baka. Við því var orðið og voru rökin meðal annars þau að peningunum væri betur varið í heilbrigðis- og menntakerfi landsins.

Kostnaður við að halda Ólympíuleika er gríðarlegur og fráhrindandi fyrir margar borgir. Ólympíuleikarnir hafa tvisvar verið haldnir í París; árin 1900 og 1924 og tvisvar sinnum í Los Angeles; árið 1932 og 1982.