Á síðustu fjórum árum hafa verið höfðuð 214 dómsmál vegna forsjármála eða lögheimils barna. Jafn mörg mál voru tekin fyrir hjá Héraðsdómi Reykjavíkur og Héraðsdómi Reykjaness, 89 talsins í báðum tilvikum en 36 mál voru höfðuð á landsbyggðinni.

Þetta kemur fram í svari Sigríðar Á. Andersen dómsmálaráðherra við fyrirspurn Bjarkeyjar Olsen Gunnarsdóttur, þingmanns Vinstri grænna. Á sama árabili var fjöldi sáttameðferðamála í forsjár- og/eða lögheimilismálum sem rekin voru hjá embættum sýslumanna á landinu 773 talsins, fjöldi umgengnismála 694 og dagsektarmál voru 83. Af þeim náðist sátt í rétt tæplega helmingi tilfela. Hlutfall forsjár- og/eða lögheimilismála sem lauk með sátt var 45 prósent, sátt náðist í 55 prósent umgengnismála og í 40 prósent dagsektarmála.

Þá kemur einnig fram í svarinu að að jafnaði líði tveir til þrír mánuðir frá því að sáttameðferð hefst og þar til henni líkur. Þó geti í einstökum tilfellum liðið lengri tími og allt upp í níu til tólf mánðuði. Ekki kemur fram hver niðurstaðan í þeim meðferðum er, það er hvort oftar náist sátt í þeim málum sem taka styttri tíma eða lengri.

Í svari ráðherrans kemur fram að um sé að ræða þau mál sem lokið var á árunum 2013 til og með 2016. Hins vegar séu, svo dæmi sé tekið, enn yfir 100 mál opin hjá sýslumanninum á höfuðborgarsvæðinu sem stofnað var til á síðasta ári.